10 July 2022

බයිසිකල් මිල

 මම කලින් බ්ලොග් ලිපි  දෙක තුනකම කියලා තියෙනවනේ ෆුට් බයිසිකලයක් ගත්තයි කියලා. ඊට පස්සේ මට තියෙන ලොකුම කරදරේ බයිසිකලය පදින එක නෙමේ. බයිසිකලය පැදගෙන යනකොට පාරේදි හම්බවෙන මිනිස්සු බයිසිකලයේ මිල කීයද කියලා අහන එක. එක්කෙනෙක් දෙන්නෙක් නම් කමක් නෑ කියමුකෝ. සමහර වෙලාවට හය හත්දෙනා අහන වෙලාවලුත් සෙට් වෙනවා. ඒක නම් මහ කරුමයක් අප්පා.

ඔන්න මම බයිසිකලයේ  මිල කිව්වා කියමුකෝ. ඊට පස්සේ ඒ මිනිස්සු සැහෙන්න විස්සෝප වෙලා එක එක  කමෙන්ට් දෙනවා.

"අම්මෝ සෑහෙන ගණන් නෙහ්  දැන්  බයික්."

"අපරාදේ  ගත්තේ. අහවල් කඩේ නම් අහවල් ගානට බයික් තියෙනවා."

"ඔය ගානට ගියර් තියෙන එකක් ගත්තා නම් තමා  වටින්නේ."

"ඕක ජපන් ද ? ජපන් එකක් නම් ඔය ගානට ගත්තට පාඩු නෑ."

09 July 2022

බයිසිකලය ගෙදර ගෙනාපු හැටි

 බ්ලොග් එකට ආවහම ලියන්න මතක් වෙන්නෙම අරගලය අර්බුදය වගේ මාතෘකා වලට අදාල දේවල්. ඒ තරම්ම මේ දේවල් අපේ ජන ජීවිතයට සෑහෙන බද්ද වෙලා තියෙන්නේ. ඒ දවස්වල නම් ආතල් එකේ කතාවක් දෙකක් කොටාගෙන යූ ටියුබ් එකේ වීඩියෝ කෑල්ලක් බලාගෙන සරල විදිහට ජීවත් උනා. දැන් නම් අපේ ජීවිත එන්න එන්න සංකීර්ණ වෙනවා.

අපිට දැන් ගොඩක් වෙලාවට හිතන්න වෙලා තියෙන්නේ රස්සාව බේරගෙන කාලා බීලා නොමැරී ජීවත් වෙන්නේ කොහොමද කියලා. බැරි වෙලාවකවත් මගේ රස්සාව ගහලා ගියොත් ආයේ ඉතින් කන්න නෙමේ ලෙවකාලා ජීවත් වෙන්නවත් බැරි තත්වයකට රට පත් වෙලා තියෙන්නේ.

හරි ඒවයින් කාරි නෑ. කලින් ලිපියක මම කිව්වනේ තෙල් අර්බුදය නිසාම මමත් බයිසිකලයක් ගත්තා කියලා. හා හා පුරා කියලා ගත්තු බයිසිකලය ගෙදර ගෙන්නත් එපෑ. ඉතින් ඒක ගේන්න ත්‍රීවිල් එකක් හොයාගෙන දාගෙන ආවොත් තවත් රුපියල් 3000ක් විතර වියදම් වෙන වැඩක්. අනික මේ දවස්වල ත්‍රීවිල් හොයනවා කියන්නේ කළුනික හොයනවාටත් වඩා අන්ත දෙයක්.

ජන ගඟක් කොළඹට

 අද සෑහෙන ජන ගඟක් කොළබට ආවා.ඒ හැමෝගෙම සටන් පාඨය උනේ ගෝටා ගෙදර පල කියන එක. 


සිවිල් ජනතාව ජනාධිපති නිල නිවසත්, ජනාධිපති කාර්යාලයටත් වැටලුවා. මේ වන විටත් ඔවුන් එක් අවට කඳවුරු ලාගෙන ඉන්නවා.



අරගලයට ජය වේවා !!

08 July 2022

රටම කොළඹට

 රටේ අර්බුද වලට පිලියම් යෙදීමට අපොහොසත් වූ පාලකයින්ට එරෙහිව රටම හෙට කොළඹට ඒමට නියමිතයි.



රට තුල අර්බුද

 මේ දිනවල ශ්‍රී ලංකාවේ ජීවත් වන පුරවැසියෝ ගත කරන්නේ කරුමක්කාර ජීවිතයකි. අප එක අර්බුදයකින් නොව අර්බුද කිහිපයකින් පීඩා විඳී. මූලිකම අර්බුදය වන්නේ රට තුල ඩොලර් නොමැතිකමයි. මේ නිසා ආනයන සීමා වී ඇත. අද්‍යවශ්‍යම දෙයක් හැරුනකොට වෙනත් කිසිඳු දෙයක් ගෙන්වන්නට නොහැකි වී තිබේ. 

මේ නිසාම දුරකතන, ලැප්ටොප් පරිගණක, විදුලි උපාංග  ආදිය රටට ගෙන්වීම සීමා වි ඇත. දැනට මිලදී ගැනීමට තිබෙන දේවල් වල මිල ද සීග්‍රයෙන් ඉහල ගොස් ඇත. 

25 June 2022

තෙල් අර්බුදයට පාපැදියෙන්

 මේ දවස්වල ලංකාවේ හොයාගන්නම අමාරු දේ තමයි පෙට්‍රල් කියන්නේ. පෙට්‍රල් ගන්න කිලෝමීටර ගණන් දිග පෝලිම් පාර දෙපැත්තෙම තියෙනවා. ඒ පෝලිමකට ගිහින් පෙට්‍රල් ටිකක් ගහ ගත්තහම ගමනක් ගිහින් ඒ ටික පුච්චලා දාන්න මොකද්ද වගේ.

ලඟ පාතකට ගිහින් ආවත් හිතේ ගින්දරෙන් යන්ඩ වෙන්නේ. කොච්චරක් පෙට්‍රල් පිච්චිලාද දන්නේ නෑ. ආයෙම කවද්ද තෙල් ගහගන්න වෙන්නේ කිය කියා හිතන්න වෙච්ච මහ ඩස්ප කාළයක් මේක.

ඒ නිසාම මම පොඩි බයිසිකලයක් ගත්තා. 

තෙල් කේස් නිසාම බයිසිකලුත් දැන් අස්ප ගනන් ගිහින්. ගේ මුල්ලකට කරලා තිබ්බ බයිසිකල් කටුත් දැන් තිස් හතලිස් දාහට එහා පැත්තේ ගනන් ගිහින්.

මම ගත්තේ ලේඩිස් ටයිප් එකේ රෝඩ් බයිසිකලයක්.මේකෙන් මටයි අපේ උන්දැටයි දෙන්නටම ලඟපාත ගමන් බිමන් ටික කවර් කරගන්ඩ පුලුවන්. මේක ලංකාවේ එකලස් කරපු එකක්. ඒකත් රුපියල් පනස්දාහකට කිට්ටු ගානක් උනා. අනේ මන්දා හොඳට තිබුන රටක් - අපි වැටිච්ච තැනක්.

12 June 2022

නයනතාරාවත - 11 කොටස - අවසානය

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම | සයවන දිගහැරුම | සත්වන දිගහැරුම | අටවන දිගහැරුම | නවවන දිගහැරුම | දසවන දිගහැරුම

 පරිච්ඡේද කිහිපයක් පුරාවටම පාඨක ඔබත් කතුවර මා සමඟ එකට එක්ව නයනතාරාගේ ජීවිතයේ සිදුවීම් සමුදායක් සියැසින් දුටුවෙමු. අප දැන් එලැඹ සිටින්නේ ඒ කතාවේ අවසානයට ය.

ඒශාන් සකුරා දේශයට වී පුරා වසරකට ආසන්න කාළයක් ගතවී ඇත. ඒ ගතවූ කාළය නයනතාරාට නම් බුද්ධ කල්පයක් වැනි ය. ගෙවෙන හැම මොහොතක්ම ඈ සිතුවේ කෙසේ හෝ තමා ඒශාන් වෙත යන බව ය. තමා අතින් සිදුවෙන හැම කාර්යයක් ගැනම ඈ ඒශාන් අයියාට ලියා යැවී ය. මුලදී නම් ඒශාන්ට නයනතාරා එවන ලියුම් වැල් බයිලා වැනි ය. ඔහු ඒ ලියමන් උඩින් පල්ලෙන් කියවා  ගිනි උදුන වෙත විසි කර දැමුවේ ය.

11 June 2022

නයනතාරාවත - 10 කොටස - සයොනාරා

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම | සයවන දිගහැරුම | සත්වන දිගහැරුම | අටවන දිගහැරුම | නවවන දිගහැරුම

 ඔවුන් රැගත් කාරය කොලොම්තොට නොයෙක් වීදී පසු කරමින් වරායට ළඟා විය. මේ වනවිට ඔහු ගමන් ගන්නා නෞකාව වරායට පැමිණ ඇති බව නයනතාරාගේ පියා කළ විමසුමකින් දැනගන්නට ලැබුණි. 

ඉන් පසුව ඔවුන් වරායේ ජැටිය වෙත ලඟා විය.

ඔවුන් ඉදිරියේ ප්‍රාදූර්භූත වූයේ සුවිසල් නෞකාවකි. මෙවන් වූ සුවිසල් යාත්‍රාවක් ඔවුන්ගේ සියැසින් දකින පළමු අවස්ථාව මෙය වේ. සියල්ලෝම විශ්මයෙන් ඇළලිනි. මොහොතක් යනතෙක්ම සියල්ලොම මුව අයාගෙන මේ විශ්මයෙන් මුසපත් විය.

මේ නැව නමින් 'සයොනාරා'  වී ය.

10 June 2022

නයනතාරාවත - 9 කොටස - සරණ මංගල්ලය

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම | සයවන දිගහැරුම | සත්වන දිගහැරුම | අටවන දිගහැරුම

දිනෙන් දින ගතැවී පුන් පොහෝ දින ලං විය. 

නයනතාරාගේ දෙමව්පියන්ට ඉස්පාසුවක් නැති කාළයක් උදා විය. ඔවුහූ මේ මංගල්ලයට අවශ්‍ය අඩුම කුඩුම සොයන්නට ද නෑ හිත මිත්‍රාදීන්ට බුලත් දී ආරාධනා කිරීමට ද මහන්සි වූහ.

මේ වන විට නයනතාරාගේ මල්ලි ද ගම ඇවිත් තිබුණි. මා කිසිම විටක නයනතාරාගේ මලයෙකු ගැන පාඨක ඔබට කියා නැත. ඒ ඔහු මේ කතාන්තරයට අදාල වන්නේ  නැති නිසා ය. අනවශ්‍ය චරිත ගොන්නකින් පාඨක ඔබව වල්මත් කරවීම මගේ කතා විලාශය නොවේ.

08 June 2022

නයනතාරාවත - 8 කොටස - අතුරුදහන් වීම

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම | සයවන දිගහැරුම | සත්වන දිගහැරුම

 දෙමාපියන්ගේ ආගමනයෙන් පසු ඒශාන් සිටියේ පස්වනක් ප්‍රීතියෙන් ඉපිළ ගොසිනි. මේ සා වූ ප්‍රීතියට හේතු සාධකය වූයේ සකුරා දේශයෙන් ආ ලියමන විය. ඔහු ආයෙත් වරක් ලියමන අතට ගෙන අකුරින් අකුර කියවා බැළීය. මේ ලියමන ඔහුට දිව්‍ය ලෝකයට වෙත ඒමට ලැබූ ඇරයුම්පතක් මෙන් වටී.

ඔහු මේ ලියමන සුරක්ෂිතව ඔහුගේ කොට්ට උරය තුල තැන්පත් කළේ ය. සෑම රාත්‍රියකම ලියමන එළියට ගෙන කියවා නැවතත් පරිස්සම් සහිතව කොට්ට උරය තුලට දැමුවේ ය.

නයනතාරාගේ පියාගෙන් සකුරා දේශයේ ගමනට අවසර ගැනීමට හොඳ වේලාවක් එනතුරු ඔහු කල් යැවී ය. යම් හෙයකින් ඔහු මේ ගමනට අකමති වුවහොත් ඔහුට සිදු වන්නේ තම හීන පොදියම කිරුලපන ඇළේ පා කර හැරීමට ය. එය එසේ සිදු නොවේවායි ඔහු නිදි පැදුරේම ඉශ්ට දේවතාවුන්ට යැදුවේ ය.

නයනතාරාවත - 7 කොටස - ඒරොප්පෙන් ලියමනක්

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම | සයවන දිගහැරුම

 දිනක්  සුපුරුදු පරිදි උදෑසන රාජකාරි හමාර කර ඒශාන් ගෙයි ඉස්තෝප්පු පඩියේ වාඩි වී පාරේ එන යන මිනිසුන් දිහා බලමින් සිටියේ ය. මෙසේ බලාගෙන සිටින විට ඈති මැදි වයසේ යුවලක් තමා සිටින දිශාවට එන බව ඔහු දුටුවේ ය.

"ආන් අම්මලා එනවා !" යැයි ඔහු ඔහුටම කියාගෙන දෙමාපියන් එන දිශාවට දුවගෙන ගියේ ඔවුන්ව දුරදීම පිළිගැනීමට ය.

"අම්මලා උදෙන්ම පිටත් උනාද ?" යැයි ඔහු ඇසුවේ ය.

07 June 2022

නයනතාරාවත - 6 කොටස - සකුරා දේශය

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුමපස්වන දිගහැරුම

 

 

 සෞම්‍යය හිරු කිරණ ඒශාන්ගේ කාමරයට එබිකම් කරමින් තවත් දිනක් උදා කළේ ය. 

ඔහු හනි හනිකට නැඟිට නිදාගත් පැදුර අකුලා පැදුරු ආනෙන් තැබී ය. රෑ සීතලට පෙරවාගත් රෙදි කඩමාල්ල ද හොදහැටි නවා ඉස්කිරිමේ නොපෙනෙන කෙළවරක තැන්පත් කළේය. ඔහු මේ සියල්ලම කළේ යාන්ත්‍රිකව ය. නිදාගත් තැන අස්පස් කිරීම ඔහු කුඩා කළ සිටම පුරුදු පුහුණු වූවකි. ගෙදරදී පුරුදු වූ හොඳ පුරුදු ඔහු නයනතාරාගේ නිවසේ ද ක්‍රියාවට නැංවීය. මේ හොඳ පුරුද්ද නයනතාර පුරුදු වී නැත. ඈ නිදාගත් තැන අස්පස් කිරීමට වෙන කෙනෙකු යා යුතු ය. බොහෝ විට ඇගේ පැදුර අස් කරන්නේ සිය මව ය. යම් හෙයකින් මව කාමරයට නො ආවොත් ඈ කලින් දා නිදාගත් පැදුර පසු දින ද එලෙසින්ම කාමරයේ එලා තිබෙනු දකින්නට පුලුවන.

06 June 2022

නයනතාරාවත - 5 කොටස - රහසක්

පළමු දිගහැරුම | දෙවන දිගහැරුමතෙවන දිගහැරුමසතරවන දිගහැරුම

 

 කේන්දර බැලීමේ ගමනින් දින කිහිපයකට පසු ගෙයි ඉස්තෝප්පුවට පැමිණි මවු දෙමව්පියෝ සතුටු සාමිචියේ යෙදෙන්නට විය. ඔවුන් නොයේකුත් මාතෘකා අරබයා කතා කලහ.

හදිසියේම කතාව නයනතාරාගේ කසාදය දෙසට යොමු විය.

"කෙළීගේ කටයුත්තට පංකාදු  නැකතක් හම්බ උනා. හැබැයි හාමිනේ, පොඩි පරහක් තියෙනවා."

"ඒ මොකද්ද අපේ මහත්තයා? " යැයි නයනතාරාගේ මව ඇසුවා ය.

"නැකත තියෙන්නේ පසලොස්වක පෝය දාක"

"ඉතින් ඒක හොඳයි නේ. එතකොට අළුත බැඳපු ජෝඩුවට රෑට පන්සල් යන්ඩත් පුලුවන් නේ !"

"මේ ගෑනිට පිස්සු හැදීගෙන එනවා ද ! යකෝ පෝය දාට අපේ කෙළී හඳ දිහා බලාගෙන හූ තියනවා කියලා බොට අමතක උනා ද ගෑනියේ ?" යැයි නයනතාරාගේ පියා අඩි පොළොවේ හප්පා පැවසුවේ ය.

05 June 2022

නයනතාරාවත - 4 කොටස - විවාහයට දින නියම වේ

පළමු දිගහැරුම | දෙවන දිගහැරුමතෙවන දිගහැරුම

 

ඔහු කොළොම්තොට අහස යට ජීවත් වීමට හුරු වී පෝය දෙක තුනක් ගෙවී ගොසිනි.

ඒ ගත වූ හැම පෝය දිනකම නයනතාරා සිටියේ සිය නැන්දනියගේ නිවසේ ය. නැන්දනියත් නයනතාරා මෙන් අත්භූත එකියකි. ඈට වත්තේ ඕනම ගසකට නැගිය හැක. ඈ වඩාත්ම ප්‍රිය කරන්නේ කොස් ගසට හෝ දෙල් ගසට නැගීමට ය.

ගසට නගින නැන්දනිය ගසින් බසින්නේ කොස් හෝ දෙල් ගෙඩි අතින් කටින් එල්ලාගෙන ය.

04 June 2022

නයනතාරාවත - 3 කොටස - කොළොම්තොටින් සියනෑවට

පළමු දිගහැරුම | දෙවන දිගහැරුම

 උත්සහයන් යුග්මයක පරාජයෙන් උමතු වූ නයනතාරා මෙවර ගැඹුරින් කල්පනා කොට තම සැලැස්ම ක්‍රියාවෙහි යෙදෙවූ වා ය.

ඒශාන් කුඩා කළ පටන් ගුරු ගෝල සබඳතාවයන් දේවත්වයෙන් සැලකූවෙකි. ගුරුවරයෙකු යමක් කියන්නේ ද, ඔහු ඒ හා විවාද කරන්නේ නැත.  ගුරුවරයෙක් යමක් කියන්නේ තම ගෝලයින්ගේ අභිවෘද්ධිය උදෙසා බව ඔහු නිරන්තරයෙන්ම සිතයි.

මේ නිසා මෙවර නයනතාරාගේ සැලැස්ම ක්‍රියාවෙහි යෙදෙව්වේ සිය ගුරු දෙමාපියන් ය.

ඈ සිය මවු දෙමාපියන් ඉදිරියේ තම සිතැඟි ඉදිරිපත් කළා ය.

03 June 2022

නයනතාරාවත - 2 කොටස - ඒශාන්

පළමු දිගහැරුම 


මේ කාළයේ  කැලණි ගඟින්  ගවු ගණනක් එතෙර ගම් පහක් එක්කොට සැදුම් ලද ගම්පහ නම් වූ ගමක අප්‍රකටව ජීවත් වූ තරුණයෙක් කොළොම්තොටට ආහ. ඔහු නමින් ඒශාන් නම් විය. 

දෙමාපියන් ඔහුට නම් තැබුවේ ශාන් කියා ය. එහෙත් පුද්ගල නාම ලේඛනගත කරන කරන නිළධාරී තැන, ඈතින් පියා සමඟ හුරතල් වන දරුවා දැක "අර කවුදැ යි ?" විචාලේ ය.

ඔහුගේ මව විසින් "ඒ ශාන් !" යැයි පෙරළා පිළිතුරු බැන්ඳා ය. ඔහුගේ මව පැවසූවේ ඒ ඈතීන් සිටින්නේ ශාන් බව ය. එහෙති නිලධාරි තැන සිතුවේ දරුවාගේ නම ඒශාන් බව ය. ඉනික්බිති ඔහු කටු පෑනෙන් එක හුස්මටම ඒශාන් යැයි නම ලියූ ලියවිල්ල මවගේ අතට දී ඒ පවුල පිටත් කලෝ ය.

එශාන්ගේ පියා නිවසේදි ලියවිල්ල කියවන විට දරුවාගේ නම ලියූ තැන දැක,  ඔහුගේ හිස වටා  හත්දින්නත් තරු පඞක්තියම බමන්නා සේ දැනෙන්නට විය.

02 June 2022

නයනතාරාවත - 1 කොටස - උත්පත්තිය

අදින් වසර ගණනාවකට පෙර අතීතයේ ලඞකාද්වීපය පාළනය කළේ සතුරු උවදුරකින් එක් ඇසක් අහිමි වූ පාතරට රදල කුළ කාන්තාවක් විසින් ය. ඈ එවකට සියනෑ කෝරලය නම් වූ පාළන ප්‍රදේශයක වූ හොරගොල්ල නම් වලව්වක ජීවත් උනා ය. 

මා පාඨක ඔබව ඒ එකැස් රැජිනගේ පාළන කාළය දක්වා කාළයේ ආපස්සට ගෙන යාමට කැමැත්තෙමි. මා ඔබට පෙන්වන්නට යන කතාන්තරය සිදු වූයේ මේ එකැස් රැජිනගේ පාලන සමයේ දීය. කතාන්තරයක් කියවා රසවිඳිනවාට වඩා එය සිදුවූ කාළ වකවානුවේ සිට සියැසින් දැක ගැනීම වටී යැයි මා සිතමි. එසේ නම් මා සමග අතීතයට ගමන් කිරීමට ඔබට ඇරයුම් කරමි.

ඈ රට පාළනය කළ සමයේ  ලඞකාදීපයෙහි කොලොම්තොටින් සිව් ගවුවක් දුරින්, එතෙර මෙතෙර යන්නාවූ මඟීහු කල්ප වෘක්ශයක් බඳු නුග ගසක් අසලින් එගොඩ මෙගොඩ වූ ග්‍රාමයක් වූහ. ලඹ නුග මුලෙහි වාරුවෙන් දිය කඳුරු වලින් එගොඩ වූ නිසා එ ගම නුගේගොඩ යැයි නම් ලදහ. නුගේගොඩින් තුන් හූවක් දුරින් විජයාරාමය නම් ග්‍රාම නාම ලත් කුඩා ගමක ගුරු කුළයක දෙමාපිය හට දා ව දුවණියක උපන්නා හ.

01 June 2022

නයනතාරාවත පූර්වාරම්භය

නයනතාරාවත යනු හුදෙක් ආදර අන්දරයක්ම නොවේ. මේ කතාන්තරය තුලින් ලාංකීය යුවතියකගේ ජීවිතයේ හරස්කඩක් විද්‍යාමාන වන කතා පුවතකි. ඇඟේ ජීවිතය තුල විඳි දුක් ගැහැට හා ඒවාට ඈ ගන්නා ලද උපායමාර්ග යනාදිය මේ කතාව තුලින් පාඨකයාට විද්‍යාමාන කරවයි.


එකල ඇසතු බෝ මුල හිඳගත් සිද්ධාර්ථ ගෞතමයෝ, "බුදු වූවොත් මිස නොනැගිටිමියි" යන පරිද්දෙන් අධිශ්ඨාන කලාක් මෙන් නයනතාරා ද කෙසේ කෝ ආල දිනා ගනිමියි යන්න අධිශ්ඨාන කලාය. 

31 March 2022

අරගලයේ පළමු වෙඩි මුරය

 අද 2022 අවුරුද්දේ මර්තු 31 වන බ්‍රහස්පතින්දා.. !

මෑත ඉතිහාසය තුල නොමැකෙන අයුරුන් සටහනක් තැබුන දිනයක් වේවි. 

ඊට මූලිකවම හේතුව වන්නේ රට තුල නොයෙක් අර්බුද ඇති කළ ජනාධිපති ගෝඨාභය රාජපක්ශ ඇතුලු රාජපක්ශ රෙජීමයට විරුද්දව මිරිහානේ ජනාධිපති නිවස ඉදිරිපිට මහා ජනකායක් විරෝදය පෑ දිනය අදයි.