17 October 2018

අසනීප වූ සති අන්තය

පසුගිය සති අන්තයේ අපේ ගම් පලාතට කඩින් කඩ වැසි ඇද හැළුණි. විටෙක මල් වැහි සීතල මල් වැසිද තවත් විටෙක නා කපනා වැහි වැටෙන වෙලාවල් ද නැතුවාම නොවේ. මොන වැස්ස තිබුණත් අපේ උන්දෑට පශ්චාත් උපාධි දේශන වලට යාමට ඇත්තේ වචනයෙන් විස්තර කළ නොහැකි අන්දමේ පුදුමාකාර උනන්දුවකි. නමුත් මේ උනන්දුව මට හෙන හිසරදයකි. කොටින්ම සති අන්තයේ දවස් දෙකම උදේට ගෙදර ඉදන් ස්ටේශමටත්, හවසට ඉස්ටේශමේ ඉදන් ගෙදරටත් මා ඈව ගෙනත් ඇරලිය යුතු ය.

පායනා කාළෙදී නම් විජය කුමාරතුංගයන් මාලනීයව මෝටර් බසියිකලයේ නංවාගෙන යන උජාරු ගමනට නොදෙවෙනි සිංහ සෙයියාවකින් මා ඈව ඉස්ටේශමට ගෙනත් ඇරලවයි. නමුත් පසුගිය සති අන්තයේ තිබූ කඩින් කඩ වැසි නිසා මේ උදාරතර කර්තව්‍යය දියාරූ කර හැරීමට මා මාන බැලිමි. එහෙත් බසයක නැග පානදුරෙන් බැසීමට ඈ දැඩි ලෙස ප්‍රතික්ෂේප කළ නිසාවෙන් කඩින් කඩ ඇද හැලෙන වර්ශාපතනයේ  යම්කිසි විරාමයකදි මා බයිසිකලය ස්ටාර්ට් කල යුතුය. ඒ ස්ටාර්ට් කල ක්ෂණයේ සිට තත්පරයෙන් දහයෙන් පංගුවකදී ඈ බයිසිකළයට ගොඩවේ. එතැන් සිට මා වලවල් බේරමින්, අඩු වේගයකින්, ආරක්ෂාකාරීව අවම කාලයකදී පානදුරට ගෙනත් ඇරලවිය යුතු ය. වැසි දිනක මේ යන ගමන මට කොයිතරම් හිසරදයක් වූවත් ඈ මේ ගමනට බොහෝ සෙයින්  ඇළුම් කරයි. බ්‍රිතාන්‍ය මහ රැජිණ ලංකාවේ වීදී සංචාරය කරන්නාක් මෙන් ඈ උජාරුවෙන් ගම්මු දෙස යටැසින් බලමින් ගමන රසවිඳින්නී ය. මා දුක් විඳින්නේය.

අසුරු සැනින් එක මොහොතකදී විරාමගතව තිබූ වර්ශාපතනය  යළි ඇරඹුනහොත් මා අසල කඩ පිලක බයිසිකලය නතර කළ යුතුය. පෙනෙන තෙක් මානයක කඩ පිලක් නැති තැනක් වැසි ඇද හැලෙන්නට පටන් ගත්තේ නම් මා චිත්ත ශක්තියෙන් කඩපිලක් මැවිය යුතු ය. අපේ උන්දෑගේ ටකරමට බොරළු ගසන අඬෝවැඩියාව අසා සිටිනවාට වඩා කඩයක් මවන එක ලේසි පහසු වැඩක් යැයි මට කිහිප වාරයක් සිතී තිබුණි.

 සුළු හෝ මධ්‍ය පරිමාණ හෝ වර්ෂාපතනයකට හසු වුවහොත් උන වෛරසයක් ඇද ගැනීමේ අපූරු ආකර්ශන හැකියාවක් අපේ උන්දෑ සතු වේ. ළඟ පාතක උන වෛරසයක් තිබුනේම නැත්නම් කැස්සක් හෝ හෙම්බිරිස්සවක් හෝ සාදා ගත යුතුම ය. වාසනාවකට මෙන් ඈට වෛරසයක් හමු වූ නිසා උන හදාගත්තා ය. මට ද බෝ කළේ ය. අපි දෙදෙනාම අපේ උන්දෑගේ මහ ගෙදර ගියෙමු.

මා ලෙඩ ඇඳට වැටුනි. ඈ ඒ ඇඳේම අනිත් පැත්තට වැටුනි !

හිසරදය, කැරකිල්ල, උන, හෙම්බිරිස්සාව, කැස්ස, ඇඟපත රුදාව මා වෙලා ගත්තෝය. මෙතැන් සිට මා ආදරණීය නැන්දම්මාගේ පුද සත්කාර වලට නතු වීමට සිදුවි ය. නැන්දම්මා ඈත වනයට ගොස් පළවැල නෙලා ගෙනවිත් මා ඇඳ අසල තබා, කන්න.. කන්න.. කාපන් යැයි පෙරැත්ත කරන්නී ය. කටේ තිත්ත ගතියට ඔය මොකවත් කන්නට බැරි බව මා කොතෙක් පැවසුවත් ඈ ඊට කන් නොදේ. හූ යන්නෙන්ම පද දෙකක් උගුරේ තිබූ සෙම තලියක පටලැවුන නිසාම මා ඇද අසල බාල්දියට සෙම පිඩක් හෙලීය. එම පද දෙක වචන ලෙස එලියට නො ආවේ මා පූර්ව ආත්මයක කළ පිනකට බව මට සිතුණි. කන්න බැරි නම් දිව්‍ය භෝජන උනත් වළදන්නේ කොහොමද දෙයියනේ  !

නැන්දම්මා කාමරෙන් පිට වුනාය.

නැන්දම්මාගේ කරදරය එතනින් නිමා වූයේ නැත. ඈ තොල් ඇලවෙන තරමේ නෙස්ටොමෝල්ට් කෝප්ප දෙකක් අප දෙදෙනාට පිළිගැන්නුවෝය. මා අල්ප-සීනි භක්ෂකයෙක් බව කොතෙකුත් පවසා ඇතත් තේ හදන වෙලාවට මා කෙරෙහි ඈගේ මාතෘක ස්නේහය දෝරේ ගලයි. ඒ නිසාම ඈ ඒ පරම පවිත්‍ර නිමල නිර්මල සුරම්‍ය සුනිමල මධුර මනෝහර (වචන ඉවරයි.) දාරක ස්නේහය සීනි වලට හරවා කිරි වීදුරුවේ දියකර හරියි.

ඈ නැවතත් කාමරෙන් පිටවූ සැනින් මා නින්දට වැටුනි.නින්ද යන්නේ ද නැත. නැගිට ගන්නටද අමාරු ය. මොන කරුමයක්ද මන්දා !

ඉන්පසු ඈ කඩිමුඩියේ දවල් බත පිසින බව මා ඉවෙන් මෙන් තේරුම් ගතිමි. නැන්දම්මගේ කෑම නම් වචනයේ පරිසමාප්ත අර්තයෙන්ම අපූරු ය. ඕනෑම කෑමක පෝෂ්‍ය ගුණය නොමරා රස මරන්නට ඈ උපන් හපන්කම් දක්වන්නියකි. අප පංචේන්ද්‍රියයන් පිනවමින් මේ මනුස්ස ලෝකයේ දුක් විඳ විඳ ඊලඟ ආත්මයට උපාධාන සකස් කර ගන්නවාට ඈ තුල ඇති අකමැත්ත නිසාම ඈ හිතාමතාම හොදි වෑංජන වල රස මරන බව මට සිතේ.

අපේ අම්මා, අපේ තාත්තා හා දීග ආ  දිනයේ පටන් ඈ පිසින බතට ලුණු ස්වල්පයක් එක් කරයි.. මේ නිසාමට වසර විසි ගණනක් අම්මගේ බත කා තිබූ මට බතට ලුණු දැමිය යුතුමය යන උදාරතර වාක්‍යය ජාන වලටම කා වැදී තිබේ. මේ නිසාම බතට ලුණු ඇති නැති අඩුව හොඳින්ම දැනේ. ලුණු නැති අඩුව බතේ මාලු පිණි වලින් නොමැකුණ විටදී බත් කන්නේද එහෙමත් දිනක ය. කෑවත් කන්නේ ආසාවකින් නොවේ.

නැන්දම්මා උයන බතට ලුණු දමන්නේ නැත. ඒ ඈට කොලෙස්ටරෝල් යන ධනවතුන්ගේ රෝගය ඇති නිසා ය.

මට මේ හැදුන උන ඇරෙන්නට ඉහෙන් බහින රෝගයක් නම් නැත. ඒ නිසා මට කෑමට ලුණු ඕනේ ම ය.

මෙවැනි කෑම වලින් මා සප්පායම් වී මදක් හිස ඔසවා ගන්නට හැකි වූ විගසම මම ගෙදර ආවෙමි. ඇවිත් අපේ අම්මා උයන බත ද හොද්ද ද රස වින්දෙමි.

06 October 2018

මහා වැස්සේ 'අප්පච්චි ඇවිත්'

අද උදේ ඉදන් මේ වෙනකන් නොකඩවාම වහිනවා. එලියටවත් යන්න හිතෙන්නේ නැති තරම් කම්මැලිකමක් හිතෙනවා. මේ වෙලාවට ඉතින් පොතක් කියවන්න තියෙනවා නම් ආයේ ඉතින් වෙන මොනවද නෙහ්... ?

ඔන්න ඔය හන්දා මම පහුගිය මාසේ ගත්තු පොත් දෙක තුනකින් එක පොතක් තෝරගත්තා කියවන්න කියලා. පහුගිය මාසේ තිබ්බ පොත් ප්‍රදර්ශනයට නම් යන්න බැරි උනා.

යන්න බැරි උනාමත් නෙමේ. යන්න ඒ හැටි උනන්දුවක් තිබ්බේ නෑ. මොකද ගොඩක් අය කියලා තිබ්බා පොත් ප්‍රදර්ශනයේ හැම තැනම දෙන්නේ 20%ක වට්ටමක් කියලා. මේ වට්ටම ගන්න ඕනකමට පොත් ප්‍රදර්ශනයට ගිහින් වැඩක් නෑ.

මරදාන ගොඩගේ, සුරස, දයාවංශ, සූරිය, විජේසූරිය ග්‍රන්ත කේන්ද්‍රය වගේ පොත් කඩවල් වලට ගියා නම් ඔය වට්ටමට පොත් ගන්න තිබ්බා. මේ වට්ටම අවුරුද්ද පුරාම දෙන හන්දා ආයේ සාහිත්‍යය මාසේ වෙනකන් ඉන්න ඕනකමක් නෑ.

25 September 2018

පිදූ රං ගල පිදුරන්ගල වීය

කාලෙකට උඩදි අපි සීගිරියෙයි පිදුරංගලයි ගියා. පිදුරංගල විහාරය වැඳලා කන්ද නගින කොට මැදකදී මගේ දනිහ පැන්න. ඒ නිසා මට ගල මුදුනටම යා ගන්න බැරි උනා.

පිදුරංගලින් පහලට බැස්සෙත් අපේ දෙන්නෙක්ගේ වාරුවෙන් වත්තම් වෙවී. ඒ නිසා මට හරියාකාරව පිදුරංගල බලාගන්ඩ බැරි උනා. ආයෙම දවසක නම් අනිවාර්යෙන්ම යන එක යනවාමයි.

පිදුරංගල වැඳලා සීගිරියට එනකොට සීගිරිය ගල නගින පඩිපෙල කිට්ටුවම වගේ ඉන්නවා අමරේ මාමා කියලා මැදි වයසත් පැනපු මනුස්සයෙක්. උන්දෑ එතැනින් යනෙන අයට සීගිරිය හා අවට වැදගත්කම ගැන හරි අපූරුවට කියලා දෙනවා.

උන්දෑ ගොඩාක් ලොකු විස්තරයක් කියලා දුන්නට මට මතක හිටියේ නෑ. මට මතක තිබ්බ ටික පහලින් කොටන්නම්.

22 July 2018

තුඩුගල ඇල්ලේ සුන්දරත්වය

පොසොන් පෝය දවසට කලින් දා ඉදලා මම කල්පනා කර කර උන්නේ පොසොන් පෝය දවසේ දන්සල් වඳින්න කොහේද යන්නේ කියලා. මුලින්ම හිතුවේ වරකාගොඩ පන්සල් යනවයි කියලා. නමුත් පන්සලක් හොඳටම වැඳපුදාගෙන එන්න නම් පෝය දාක යන එක හරි නෑ කියලා හිතුනා. පෝය දාට පන්සලේ සීල් ගන්න එන දායකයන්ගෙන් පිරිලා යන නිසා මම පෝය දවස්වල පන්සල් යන්න කැමති නෑ.

ඒ නිසා මම වෙන කොහේ හරි යන්ඩ ඕන කියලා හිත හිතා උන්නා.  සතියේ මැද නිවාඩු දවසක් නිසා වැඩිය දුර නැති තැනක් ගැන කල්පනා කරනකොට තමයි තුඩුගල ඇල්ල බලන්න යන්න ඕන කියලා හිතුනේ.

මේ ගමනට මම විතරක් නෙමේ මගේ යාළුවෙකුයි එයා යාලුවෙලා ඉන්න ගෑල්ලමයයි සැට් උනා. අපි මේ ගමන ගියේ බයිසිකල් වල. ඒ දෙන්නා උදේ 8:30 වෙනකොට බණ්ඩාරගමට එනවයි කියලා කියපු නිසා මම උදේ ලැහැස්ති වෙලා උන්නා. උදේ නමය වෙනකොටවත් මුන් දෙන්නා ආවේ නෑ. මම කෝල් එකක් දීලා බලනකොට මුන් තාම කොළඹින් පිටත් වෙලාවත් නෑ.

මුන් දෙන්නා බණ්ඩාරගම කිට්ටුවට එනකොට උදේ 11:30ත් පහුවෙලා. මට බලන් ඉදලා ඉදලා ඇති උනා. ඇයි වදේ මුන් එනවයි කියන වෙලාවට නෙමේ නෙහ් එන්නේ.

21 July 2018

හැබෑවූ හීනය හෙවත් යකාගේ පඩිපෙළ -4 කොටස (අවසාන කොටස)

යකාගේ පඩි පෙළ සංචාරය කරන එක මගේ හීනයක් වෙලා තිබ්බ සංචාරයක් කියලා මම කලින් ලිපියකින් කිව්ව මතක ඇතිනේ. ඒ හීනය අවුරුදු හතරකට පස්සේ ඉශ්ට වෙලා අපි ඔහියේ ඉදලා කළුපහනට පයින්ම ආවයි කියල කට්ටියම දන්නවනේ. අන්න ඒ ටික කියවන්න ලැබුණේ නැත්නම් මේ ලිපි තුන කියවලා එන්න.

පළමු ලිපිය | දෙවෙනි ලිපිය | තුන්වෙනි ලිපිය

අපි ලංකා ඇල්ල බලලා අඩිපාර දිගේම ඉදිරියට ආවා. ඒ අඩිපාර හැදිලා තිබ්බේ පයිනස් වනාන්තරයක් හරහා. සෑහෙන ප්‍රපාතාකාර බෑවුමක් හරහා වැටිලා තිබ්බ පයිනස් වනාන්තරයක්.

බෑවුම නිසාම අපි ඉතාම පරිස්සමින් තමා මේ අඩිපාරේ ගමන් කලේ. පොඩ්ඩක් හරි මිස් උනොත් සහෙන පල්ලෙහාකට වැටෙනවා. අනික පයිනස් කොළ උඩින් අඩිය තියන එක අපි හිතන තරම් සුන්දර නෑ. පයිනස් කොළ සෑහෙන්න ලිස්සනවා.

හැබෑවූ හීනය හෙවත් යකාගේ පඩිපෙළ -3 කොටස

කලින් ලිපියේදී අපි සුන්දර පරිසර පද්ධතියක් මැදින් පහලට බැස්සා කියලා මම කිව්වා මතක ඇති නේ. ඒ ලිපි දෙක තියවන්න බැරි උනා නම් පහල සබැඳි දෙක ක්ලික් කරලා කියවන්න.


අපි සෑහෙන සීතල වතුරකින් නාලා ආපහු ගමන පටන් ගත්තා. නාලා ඉවර උනහම බඩගින්නකුත් ආපු නිස අපි ඉතුරු වෙලා තිබ්බ පානුයි බිස්කටුයි කෑවා. මේ වලාවට උනුවෙන් බත් ටිකක් කන්න තියෙනවා නං කියලා වැඩක් නෑ. නමුත් දුශ්කර ගමනක් යනකොට ඔය වගේ පහසුකම් බලාපොරොත්තු වෙන්න බෑ. ඒ නිසා අපි ගෙනාපු දෙයින් සෑහීමට පත් උනා.

 මේ වෙනකොට වෙලාව දවල් දොලහා විතර කිට්ටු වෙලා.

දවල් දොළහා කියන්නේ රටේ ඕනම පැත්තකට අවු රශ්මිය වැඩියෙන් දැනෙන වෙලාවක් කියලා දන්නවා නෙහ්. අපි හිටපු කළුපහන හරියටත් එහෙමයි. චණ්ඩ හිරු රශ්මියක් තියෙන වෙලාවක ඇවිදින එකත් ටිකක් විතර එපා වෙන වැඩක්. විටින් විට හමන සුළං ධාරාව නිසා ඒ අවුවේ තිබ්බ රළු බව ටිකක් විතර අඩු කරන්න සමර්ථ උනා කියලා කිව්වොත් හරි.

අපි යකාගේ පඩි පෙළ පාරේ ටික දුරක් ඇවිදිනකොට ඈතින් කුඩා ප්‍රමාණයේ දිය ඇල්ලක් කඩා හැලෙන හැටි දැක්කා. ඒ තමා අපේ ඊළඟ ගමනාන්තය. ඒ ලංකා ඇල්ල !!

හැබෑවූ හීනය හෙවත් යකාගේ පඩිපෙළ -2 කොටස

ගමන පටන් අරන් මුල් හරිය එනකොට අපි දකින දර්ශනය සෑහෙන ලස්සනයි. වටේටම කඳු වලල්ලක් තියෙනවා. ඒ අතරින් පහත් බිමක අතුරපු දුඹුරු පාට සිහින් නූලක් වගේ ඇදෙන පාරක් තියෙනවා. කිසිම මිනිස් පුලුටක් දකින්න හම්බ උනේ නෑ.කිසිම යන්ත්‍ර සූත්‍රයක හඩක්, කිසිම වාහනයක හඩක් අහන්න ලැබුණේ නෑ. කොටින්ම අපි සෑහෙන්න ස්වබාවධර්මයට සමීප වෙලා තිබුණා. තව දෙයක් තමා උදෙන්ම අවදි වෙච්ච කුරුල්ලන්ගේ කිචි බිචි නාදයත් වටින් ගොඩින් ඇහෙන්න තියෙනවා.

රෑ තිස්සෙම පුංචි පුංචි පැලෑටි උඩට වැටිච්ච පිණි බිංදු ඒ වෙනකොටත් දකින්න පුලුවන් උනා. මේ හැම දර්ශනයක්ම කැමරා කාචයක සුන්දරව සටහන් කර ගන්න අපි සමර්ථ උනේ නෑ.

හැබෑවූ හීනය හෙවත් යකාගේ පඩිපෙළ -1 කොටස

මීට අවුරුදු හතරකට විතර උඩහදී මම ලක් දසුන් වෙබ් අඩවියේ තිබ්බ ලිපියක් දැක්කා. ඒ ලිපියේ තිබුණේ යකාගේ පඩිපෙළ කියල පාරක සංචාරය කරපු සංචාරක සටහනක් ගැන. ඒ ලිපිය කියවලා පින්තූර ටික දැක්කට පස්සේ මගේ හිතෙත් පොඩි පහේ දොළ දුකක් උපන්නා මේ පාරේ සංචාරය කරන්න. ඒක ඒ තරමටම සුන්දර පාරක්.

මම ඉතින් ඒ ආසාවට අන්තර්ජාලය පීරලා කරුණු හෙව්වා. ඒත් එක්කම ගූගල් සිතියමෙන් පාරේ දුර ප්‍රමාණයත් බැලුවා. ඒ පාර පටන් ගන්නේ ඔහියෙන්. අවසන් වෙන්නේ කළුපහන හන්දියෙන්. මුළු දුර කිලෝමීටර් 15ක් විතර වෙනවයි කියලා තමා ගූගල් සිතියමේ සදහන් උනේ.

ඒ එක්කම ගමන යන විදිහයි යන්න ඕන බස් එක මොකද්ද කෝච්චිය මොකද්ද යනාදී නානාප්‍රකාර විස්තර හොයා ගත්තා.

ඊට පස්සේ තමා කට්ටිය හොයාගන්න ගේමට බැස්සේ. ට්‍රිප් එකකට කට්ටියක් හොයාගන්න එක අපි හිතනවටත් වඩා අමාරු වැඩක්.ට්‍රිප් එකක් යමුයි කියලා කිව්වහම අපේ කට්ටියගේ ප්‍රතිචාර කොටස් තුනකට වර්ග කරන්න පුලුවන්. පළවෙනි සෙට් එක ගත් කටටම හා කියනවා. හා කියලා ගමන යන්න අනිවාර්යයෙන්ම එනවා. දෙවෙනි සෙට් එක හා කියලා කිව්වට දිනය ලං වෙනකොට බෑ කියනවා. තුන්වෙනි සෙට් එක අදාල දවසේ උදේ එන්නේ නැතුව පොලු තියනවා.

12 July 2018

සිත නිවන කළුගල ආරණ්‍යය සෙනසුන

මාකෙළි ඇල්ල බලන්න ගිහින් සතියකට දෙකකට විතර පස්සේ මම වැඩ කරන තැන යාළුවෝ කිහිප දෙනෙක් සෙට් කරගෙන කළුගල ආරණ්‍යය බලන්ඩ යමු කියලා කතා උනා. කළුගල ආරණ්‍යය විතරක්ම ගිහින් එන එක අපරාදේ නිසා මාකෙළි ඇල්ලත් බලාගෙනම යමුයි කියලා තමයි පස්සේ අපේ සැට් එක තීරණය කලේ.

මුලින් මුලින් අපේ කන්තෝරුවේ වැඩ කරපු අයගෙන් සීමිත කොටසක් තෝරා බේරාගෙන ආරාධනා කරන්නයි අපි හිතන් හිටියේ. මොකද අපි යන්න උන්නේ කාර් දෙකක නිසා වැඩි පිරිසක් ගෙනියන එක කරන්න බෑ. ඒ නිසා කාර් දෙකට හරියන පිරිසක් තෝරන්න මුලින් මුලින් අපහසු උනා. මොකද එකෙක්ට කියලා අනිත් එකාට නොකිය හිටියොත් ඌ තරහා වෙනවා.

ඌට කියලා තව එකෙක්ට නොකිව්වොත් අරූ තරහා වෙනවා. ඒ නිසා අපි සීමිත පිරිසක් තෝරාගත්තා.

ට්‍රිප් එක ලෑස්ති කරනකොට කාර් දෙකට වඩා වැඩි පිරිසක් හිටියා. පස්සේ පස්සේ එකා දෙන්නා හැලිලා ගිහින් අන්තිමේදි දෙන්නයි ඉතුරු උනේ. මමයි කාර් එකක් අයිති අපේ යාළුවෙකුයි.

මොනවා කරන්නද ?

අපි දෙන්නා මේ ගමන එන්ඩ තීරණය කලා.අපි දෙන්නා කතා කර ගත්තේ හොරණ හරහා ගිහින් පාහියංගල බලලා එතැනින් මාකෙලි ඇල්ල බලන්න්න කියලා. ඊට පස්සේ කළුගල ආරණ්‍යය බලන්න තමයි අදහස උනේ.

මගේ යාළුවා කොහිලවත්ත පැත්තේ එක්කෙනෙක්. ඒ නිසා එයා කොළඹ ඉදලා හයිවේ එකෙන් ගැලනිගමට ආවා. මම කාර් එකට ගොඩ උනේ ගැලනිගම හරියෙදි. එතන ඉදලා අපි දෙන්නා අනිත් සෙට් එකට බැන බැන හොරණට ආවා.

01 July 2018

මාකෙළි ඇල්ලට ගිය ගමන

ගිය මාසේම හැම සති අන්තයකම මම කළුතර දිස්ත්‍රික්කයේ එකේක පැති වල ඇවිද්දා. කොළඹට ගොඩක්ම ළඟින් කැලෑවක් හරි දිය ඇල්ලක් හරි බලන්න යන්න ඕන කෙනෙක් ඉන්නවා නම් ඒකට කළුතර දිස්ත්‍රික්කය කියාපුම පැත්තක්. ඒ තරමටම සුන්දර පරිසරයක් තමයි කළුතර තියෙන්නේ.

කළුතර කියන්නේ මතුගම බදුරලිය පැලවත්ත අගලවත්ත වගේ පැති. ඒ පැති වලට කොච්චර ගියත් එපා වෙන්නේ නෑ. මං පාහියංගල ගිය දවසේම මාකෙළි ඇල්ල බලන්න යන්න ඕන උනත් අපේ උන්දෑගේ බර බරේ හන්දා එහේ යන්ඩ උනේ නෑ. ඔන්න ඒ නිසා මම ඊලඟ සතියේ ඒ පැත්තේ ගිහින් එන්ඩ ඕන කමක් තිබ්බා.

මාකෙළි ඇල්ල ගැන මම මුලින්ම දැක්කේ පානදුරේ ස්ටේෂන් එකේ තිබ්බ බෝඩ් එකකින්. ඒ බෝඩ් එකේ තිබ්බ මාකෙළි ඇල්ල පින්තූරේ නිසා මට එහේ යන්ඩ ආසාවක් තිබ්බා. නමුත් යන්ඩ එන්ඩ විදිහක් නැති නිසා ඒ ආසාව කල් දාන්ඩ උනා. ඒ ආසාව ආයේ දළු දාලා වැඩෙන්න ගත්තේ මට බයික් එක හම්බ උනාට පස්සේ.

මාකෙළි ඇල්ල පිහිටලා තියෙන්නේ පැලෑද එහෙම නැත්නම් පාලින්ද නුවර ප්‍රාදේශිය සභා බල ප්‍රදේශයේ. පාලින්ද නුවර රජකම් කරපු වීදිය බණ්ඩාර කුමරුන් දිය කෙළි ඇල්ල නිසා මේ ඇල්ලට "මා කෙළි ඇල්ල" විදිහට නම් ලැබිලා තියෙනවයි කියලා තමා සදහන් වෙන්නේ.

ජූනි මාසේ 9 වනදා අපි දෙන්නා උදේ දහයට විතර අළුබෝමුල්ලෙන් පිටත් උනා. අපි දෙන්නයි කිව්වේ මායි අපේ උන්දැයි. අළුබෝමුල්ලේ ඉදලා එච්චර දුරක් නැති නිසයි අපි ඒ වගේ වෙලාවක පිටත් උනේ. නැත්තං උදේ දහය කියන්නේ ට්‍රිප් එකක් යන්ඩ හොඳ වෙලාවක් නෙමේ.

27 June 2018

දන්සල් වැඳීමේ කළාව

වෙන අවුරුදු වල වගේ නෙමෙයි මේ අවුරුද්දේ වෙසක් පෝය තිබ්බේ අප්‍රේල් මාසයේ. ඒ නිසා මිනිස්සු සිංහල අවුරුද්ද සමරලා ඒ පැත්ත බලලා මේ පැත්ත බලනකොට වෙසක් පෝයත් ඇවිල්ලා.  ඔන්න ඔය සීන් එක නිසා මෙදාපාර මිනිස්සුන්ට හරියට වෙසක් සමරගන්නත් බැරි උනා.

ඒ හින්දමද කොහෙද වෙසක් එකට දන්සල් වල අඩුවක් එහෙමත් මං දැක්කා. අවුරුදු වියදම් වලින් හතේ හත වැදිලා උන්නු මිනිස්සුන්ට දන්සලකට කියලා කීයක් හරි දීගන්න විදිහක් නැති වෙච්ච එක වෙන්ඩ ඕන මූලිකම හේතුව.

වෙසක් පෝය අප්‍රේල් වලට ගිය නිසා පොසොන් පෝය මැයි මාසෙට ගියා. මිනිස්සු නම් කැ4මති උනේ නෑ මැයි මාසේ තිබ්බ පෝය, පොසොන් පෝය කියලා සමරන්න. ඒ හින්දම ඒ පෝය අධි පොසොන් පෝය වෙලා ජූනි මාසේ තිබ්බ පෝය ඔරිමජිනල් පොසොන් පෝය උනා.

හැබැයි අපරාදේ කියන්ඩ බෑ ඇදි පොසොන් පෝයටත් දන්සල් තිබ්බා. දන්සල් වලින් නම් ඒ පෝයයි මේ පෝයයි කියලා වෙනසක් නෑ. දිගට හරහට දන්සල්.

පොඩි කාලේ ඉදලම පුරුදු වෙච්ච හින්දම ද මන්දා වෙසක් පෝයටයි පොසොන් පෝයටයි මට ගෙදර ඉදලා ගෙදර බතක් කාලා ඉන්න හිතෙන්නෙම නෑ.

17 June 2018

පහ සමත්

පහුගිය ලිපි සැට් එකම ලිව්වේ මම සංචාරය කරපු එක එක ස්ථාන ගන නිසා මේ ලිපියෙන් වෙන දෙයක් ලියන්ඩ ඕන ය කියලා හිතුනා. අද ලියන්ඩ යන්නේ මම ලඟදි බලපු සිංහල චිත්‍රපටියක් ගැන. අවුරුද්දකට සිංහල චිත්‍රපටි පහ හයක් එලි දක්වනවා නෙව.

ඒවයිනුත් ගොඩක් චිත්‍රපටි, 'වාණිජ චිත්‍රපටි' ලේබලයෙන් එලි දක්වන එව්වා. ඒ ඇරෙන්න හොඳ කතා තේමාවක් ඔස්සේ එන චිත්‍රපටි එන්නේ කලාතුරකින්. යම්කිසි කතා බහකට ලක් කළ යුතු චිත්‍රපටියක් ලංකාවේ නිර්මාණය වෙන්නේ එහෙමත් කාලෙකින්.

මේ ලඟකදි ආපු පහ සමත් චිත්‍රපටිය මම බැලුවට පස්සේ පොඩි අදහසක් ඒ ගැන ලියන්න ඕන කියලා හිතුනා.

පහ සමත් චිත්‍රපටියේ කතාව ගෙතෙන්නේ ඈත කැලෑ ගමක ජීවත් වෙන, පහ වසරේ ඉගෙන ගන්න සමත් කියලා කුඩා දරුවෙක් ගැනයි.

09 June 2018

මගේ ගමන් සගයා පානදුරේට ආ හැටි

පහුගිය අවුරුදු කිහිපයම මම මහන්සි උනේ ගෙයි වැඩ කටයුතු ටික එකලාසයක් කරගන්න. ඒක යාන්තන් එකලාසයක් කර ගන්න පුලුවන් උනා. සම්පූර්ණයෙන්ම වැඩ ඉවර කරගන්න නම් තාම හම්බ උනේ නෑ. ඒත් පදිංචි වෙලා ඉන්න පුලුවන් විදිහේ වැඩ ටිකක් ඉවර කරගන්න පුලුවන් උනා.

ඒ දවස්වල මට එක එක වැඩ වලට හාඩ්වෙයාර් එකට දුවන්නයි පානදුරේට ගිහින් එන්නයි සිද්ධ උනා. ඒ හැම දේටම බස් හෝල්ට් එකට වෙලා බස් එකක් එනකන් කාලේ කකා ඉන්න සිද්ධ වෙනවා. ලඟපාතක නං කකුල් දෙකට පිං දිදී පයින්ම බඩගානවා. මේ නිසාම මට මොකක් හරි වාහනයක් තිබ්බා නම් හොඳයි කියලා අනේක වාරයක් හිතිලා තියෙනවා.

එහෙම හිතුනට ඒකට වියදම් කරන්න වෙනම මුදලක් අතේ තිබ්බේ නෑ. ඒ නිසා එහෙට මෙහෙට දුවලා එන්න පොඩි වාහනයක් ගන්නවයි කියලා එන හීනය දවසෙන් දවසම ඈතට ගියා.

දැනට අවුරුද්දකට විතර උඩදී මම අපේ තාත්තගේ බයිසිකලයෙන් ට්‍රයල් පෙන්නලා ලයිසොම ගත්තා. ලයිසනුත් තියෙන එකේ බයිසිකලයක් ගන්න තිබ්බා නම් හොදයි කියලා වැඩි වැඩියෙන්ම මට පහුගිය අවුරුද්දේ හිතෙන්ඩ ගත්තා.

පෝදා පාහියංගල වන්දනාව - 2 කොටස

අළුබෝමුල්ලේ ඉදලා පැයක විතර කාළයකින් අපි පාහියංගලට ලඟා උනා. පෝය දවසක් නිසා වන්දනාකරුවෝ ටිකක් වැඩියෙන් පාහියංගලට ඇවිල්ලා තිබුණා. අපි බයිසිකලේ පාර්ක් එකෙ නවත්තලා පන්සල පැත්තට ආවා. පන්සලට යන පාර පටන් ගන්න තැනම පොඩි තොරණක් ගහලා තියෙනවා.

ක්‍රිස්තු පූර්ව 5 වන සිය වසේ ලංකාවට පැමිණි චීන ජාතික දේශ සංචාරක පාහියන් හිමියන් නවාතැන් ගත්තු ලෙන නිසා මේ ලෙන් විහාරයට පාහියන්ගල කියල ප්‍රසිද්ධ උනාලු. නමුත් පුරා විද්‍යා දෙපාර්තුමේන්තුවෙන් මේ බව තාම තහවුරු කරගෙන නෑයි කියලා තැන් තැන් වල ප්‍රදර්ශනය කරලා තියෙන පුවරු වල සදහන් උනා.

නියම සංචාරකයෙක් නං සංචාරයෙන් පස්සේ එතැන පා සටහන් විතරයි ඉතුරු කරලා යන්නේ. ඒ ඇරෙන්න කිසිවක් දාලා යන්නේ නෑ. ඒ අතින් උන්නාන්සේ නියම සංචාරකයෙක් කියලා පැහැදිලි වෙනවා.

04 June 2018

පෝදා පාහියංගල වන්දනාව

මේ අවුරුද්දේ වෙසක් පෝය දවසයි පොසොන් පෝය දවසයි යෙදිලා තිබුණේ හරි අපූරු විදිහකටයි. වෙසක් පෝය බක් මාසයේත් පොසොන් පෝය වෙසක් මාසයේත් යෙදිලා තිබුණා. ඒ උනාට සමහර දින දර්ශන වල නම් මේ පෝය 'අධි පොසොන්' පෝය විදිහට නම් කරලා තිබුණා. මේ හින්දමද කොහෙද වෙනදට පොසොන් පෝයට තියෙන පෝදා දහම් කාරණා වල අඩුවක් දකින්න පුලුවන්. අපේ පන්සලේ එහෙම මිහිදු පෙරහැර පැවැත්තුනේ නෑ.

හැබැයි එහෙම කියලා නෑ. මේ පෝය දවස දන්සල් වලින් නම් බොහොම සරු සාරයි !

පෝයක් කියන්නේ මට නම් නිවාඩු දවසක් නිසා ගෙදර කම්මැලිකමේ උන්නා. එතකොට තමා මට හිතුනේ කොහේ හරි යන්න ඕන ය කියලා. මගේ රයිගම් රාජධානියේ සංචාරයෙන් කොටසක් යන්න තිබුණා නම් කියලා හිතුනා.

එහෙම කල්පනා කර කර ඉන්නකොට තමයි අපේ උන්දෑ කිව්වේ ඔයා පාහියංගල යන්න ඕන කියලා කිය කියා ඉන්න නිසා එහේ යං කියලා.

"ඒකත් හොද අදහස !" මාත් ඒ තීරණය අනුමත කරලා දෙන්නම උදෙන් ගෙයින් එලියට බැස්සා පාහියංගල යන්න හිතාගෙන.වෙනදා නම් මේ වගේ ගමනක් යනකොට බස් හෝල්ට් ගානෙයි පයිනුයි යන්න සිද්ධ වෙන නිසා මේ වගේ ගමන් යන්න අපේ උන්දෑ එච්චර මනාප නෑ.

දැං තත්වේ වෙනස්. මගේ බයිසි මොටෝව තියෙන නිසා හිතෙන ගමනක් සුටුස් ගාලා ගිහින් එන්ඩ පුලුවන්. එදිනෙදා ගමන් බිමන් යෑම ඒ තරමටම සරල වෙලා.

මං රුක්ගහ තොටුපොල පාරේ ඉදලා කුරුස හන්දියෙන් පානදුරේ හොරණ පාරට හැරෙව්වා. එතන ඉදලා අළුබෝමුල්ල හන්දිය, බොල්ගොඩ හරහා රමුක්කනට ඇවිත් එතනින් බණ්ඩාරගමට ආවා.

බණ්ඩාරගම පහු කරගෙන හොරණ කිට්ටුවට එනකොට පාර අයිනේ බෙලිමල් දන්සලක් දෙනවා. බෙලිමලුයි සීනි හකුරුයි. එතනින් බෙලිමල් එකක් බීලා හොරණට ආවා. හොරණ-අඟුරුවාතොට පාරට බයිසිකලය හරවලා කිලෝ මීටර් තුනක් විතර ඒ පාරේ ආවා. කිලෝමීටර් 3ක් විතර ආවහම බැල්ලපිටිය කියලා හන්දියක් හම්බ වෙනවා.

බැල්ලපිටිය හන්දියෙන් බුලත්සිංහල මතුගම පාරට හරවන්ඩ ඕන.ඊට පස්සේ අපි කදන හන්දියට ආවා. ඒ හරියේ නම් බත් දන්සලක් දෙන්න ලෑස්ති කරලා තියෙන විත්තිය අපි ඈත තියාම දැක්කා. එනගමන් ඒ දන්සල වැඳගෙන එන්ඩ ඕන කියලා හිතේ තියාගෙනම පාරේ ඉදිරියටම ඇදුනා. කදන හන්දියෙන් එහාට්ට පාර හරිම ලස්සනයි පාරේ සමහර තැන් වල එක යායට රබර් වවලා තිබ්බා. සමහර තැන් වල පොඩි පොඩි තේ වතු හිටං තිබුනා. කදන හන්දියෙන් පස්සේ අපිට ඊලඟට හම්බ වෙන්නේ නාරගල කියලා ගමක්.

13 May 2018

රයිගම් රාජධානියේ අසිරිය සොයා - 2 : පතහවත්ත රජමහා විහාරය

රයිගම් රාජධානිය මතක් උනහම ඊට පස්සේ මතක් වෙන්නේ අපි ඉතිහාස පොතෙන් ඉගෙන ගත්තු රයිගම් බණ්ඩාර කියන නාමය. කෝට්ටේ රජකම් කරපු හත්වන විජයබාහු පිය රජතුමාට එරෙහිව තම පුතුන් තිදෙනා කැරැල්ලක් මෙහෙය වූ බව ඉතිහාසයේ සදහන් වෙන කාරණාවක්. පියාගේ මරණින් පස්සේ කෝට්ටේ රාජධානිය පුතුන් තිදෙනා අතරේ වෙන් කරගත් බව විජය බා කොල්ලය නම් වූ සිදුවීමේදි ඔබ අසා ඇති බවට සැකයක් නැත.

සීතාවක රාජධානිය මායාදුන්නේ කුමාරයාත් කෝට්ටේ රාජධානිය හත්වන බුවනෙකබාහු කුමාරයාත් රයිගම රාජධානිය රයිගම් බණ්ඩාර කුමාරයාත්  රජකම් කළ බව ඉතිහාසය සාක්ෂි දරයි.

රයිගම් බණ්ඩාර රජතුමාගේ මාලිගය තිබුණා යැයි සැක කරන ප්‍රදේශයේ තමයි මේ පතහාවත්ත රජමහා විහාරය ඉතිකරලා තියෙන්නේ. මාලිගය වටා ඉදිපරපු කබොක් බැම්ම ඒ ඉතිහාසයේ වර්තමාන සාක්ෂි වශයෙන් ඉතිරි වී පවතී.

රයිගම් රාජධානියේ අසිරිය සොයා - 1

අද ඉරිදා දවසේ ගෙදර කම්මැලිකමේ ඉන්නැද්දි නිකමට වගේ හිතුනා ළඟපාත කොහේ හරි ගිහින් එන්න තිබ්බා නම් හොඳයි කියලා. ඉස්සර වගේ නෙමේ අපේ මලයට පින් සිද්ධ වෙන්ඩ උගේ බයිසිකලේ මට දීලා ගිය නිසා හිතෙන හිතෙන ඕනම තැනකට ගිහින් එන්න ලේසියි. නැත්නම් ඉතිං බස් එනකන් ඉන්නයි බස් හෝල්ට් ගානේ පයින් බඩගාන්නයි එපා වෙනවා.

කොහෙද යන්නේ කියලා හිත හිතා ඉන්නැද්දි මතක් උනා බොල්ගොඩ ගඟේ තොටුපොලවල් කිහිපයක් ඉතුරු වෙලා තියෙනවා නේද කියලා. මගේ ලොකු ආසාවක් තියෙනවා බොල්ගොඩ ගඟේ තොටුපොලවල් සේරම වගේ බලලා එන්ඩ. අන්න ඒ ආසාවට එහේ යනවද කිය කියා හිතනකොට තමයි මම අන්තර්ජාලයෙන් යන්ඩ ඕන පැත්තක් ගැන කරුණු හෙව්වේ.

ඔන්න එතකොට තමා පතහාවත්ත රජමහා විහාරය ගැන විස්තර හම්බ උනේ.

04 March 2018

සඳගලතැන්නෙන් සිරිපා කරුණා කළෙමු.

සිරිපා කරුණා කරන්න පාරවල් 6ක් තියෙනවා කියලා මම කලින් ලිපියක කිව්වා මතක ඇතිනේ. මේ වෙනකොට මම රත්නපුර පලාබද්දල  පාරයි හැටන් නල්ලතන්නිය පාරෙයි සිරිපා කරුණා කරලා තියෙනවා. තාම නම් එරත්න පාරෙන් යන්න බැරි උනා. ඒකත් මතු දවසක යන්න හිතාගෙන ඉන්නවා.

මේ අවුරුද්දේ සිරිපා වාරේට අපි සිරිපා කරුණා කරන්න තෝරගෙන තිබුනේ ඉතාම කෙටි පාරක්. ඒ පාරේ නම තමයි සඳගලතැන්න මරේ වතු යාය මාර්ගය. මේ පාරෙන් සිරිපා කරුණා කරන්න ගොඩක්ම ලේසියි. පෑ තුනකින් සිරිපා මළුවට යාගන්ඩ පුලුවන්.

සඳගලතැන්න මාර්ගයෙන් සිරිපා කරුණා කරන්න හිතාගෙන ඉන්න කෙනෙක් ඉන්නවා නම් ඒ අය මුලින්ම කරන්න ඕන හැටන් නල්ලතන්නිය පාරේ නල්ලතන්නිය සිරිපා පිවිසුම් මාර්ගය වෙනකන් වගේ එන්න ඕන.නල්ලතන්නියට කිලෝමීටර් 1කක් වගේ දුරක් කිට්ටු කරලා තුම්මං හන්දියක් හමු වෙනවා. ඒ හන්දියෙන් එක පාරක් වෙන් වෙන්නේ නල්ලතන්නිය සිරිපා පිවිසුම් මාර්ගයට. අනිත් පාර මරේ වතු යාය ෆිෂිං හට් මාර්ගය.

10 February 2018

සිරිපා කරුණාවේදී අප දකින සුන්දරත්වය

මේ සිරිපා වන්දනා සමයයි. සිරිපා වන්දනා සමයේදී වන්දනාකරුවන් සිරිපා කරුණා කිරීම සදහා ප්‍රධාන මාර්ග දෙක ඇතුළුව ගමන් මාර්ග 6ක් මේ වන විට භාවිත කරයි. මේ ගමන් මාර්ග 6 කෙටියෙන් සදහන් කලහොත්,

1. හැටන් -  නල්ලතන්නිය මාර්ගය
2. රත්නපුර - පලාබද්දල මාර්ගය
3. කුරුවිට - එරත්න මාර්ගය
4. සඳගලතැන්න මරේ වතු යාය මාර්ගය
5. දැරණියගල උඩමාලිබොඩ මාර්ගය
6. දෙහෙනකන්ද මාර්ගය යනුවෙන් නම් කර හැක. මා ඉහත සදහන් කල පළමුවෙනි හා දෙවෙනි මාර්ග දෙක ප්‍රධාන මාර්ග දෙක වේ.

බොහෝ වන්දනාකරුවන් දෙවෙනි මාර්ගය එනම් හැටන් නල්ලතන්නිය මාර්ගය භාවිතා කරන්නේ ගමන් පහසුව සදහා ය. දැනට බොහෝ වන්දනාකරුවන් අතර හැටන් නල්ලතන්නිය මාර්ගය ජනප්‍රිමය මාර්ගය වන්නේ අඩුම කාළයකදී සිරිපා කරුණා කිරීමට හැකි නිසාවෙනි.

මේ නිසාම මාර්ගය දෙපස කඩවල් රාශියක් දැක ගත හැකි වන්නේ මේ මාර්ගයේ ඇති 'ජනප්‍රිය' බව නිසාම විය යුතු ය. මේ ජනප්‍රිය බව නිසාම සමනල අඩවි පරිසර දූෂණය වැඩියෙන්ම සිදුවන මාර්ගයත් මෙය බව පහන් සංවේගයෙන් යුතුව උවද පැවසිය යුතු ය. විටෙක මේ මාර්ගය වෙලෙන්දන්ගේ පාරාදීසයක් බවට පත්වී ඇතැයි කිවහොත් එය අතිශයෝක්තියක් නොවේ.

10 January 2018

The Prestige නම් වූ චිත්‍රපටිය

ඕනෑම මැජික් එකක කොටස් තුනක් තියෙනවා.

1. The Pledge - මැජික්කරු ඔබට සාමාන්‍ය දෙයක් පෙන්වනවා. ඔබ ඒ දිහා හොඳට බලාගෙන ඉන්නවා.උදාහරණයක් විදිහට කුරුල්ලෙක්, කාඩ් එකක් හෝ මනුස්සයෙක්.

2. The Turn - ඊට පස්සේ ඔහු ඒ සාමාන්‍ය දෙයින් අසාමාන්‍ය දෙයක් බවට කරනවා. දැන් ඔබ හොයනවා ඒ සාමාන්‍යය දෙයට මොකද උනේ කියලා.නමුත් ඔබට හොයාගන්න බෑ. මොකද ඔබ උවමනාවෙන් බලන්නේ නෑ.

3. The Prestige - සාමාන්‍ය දෙයකින් අසාමාන්‍ය දෙයක් කිරීම පමණක් ප්‍රමාණවත් නෑ. උදාහරණයක් විදිහට කාඩ් එකක් අතුරුදහන් කිරීම පමණක් ප්‍රමාණවත් වෙන්නේ නෑ. මැජික්කරු එය ආපහු ගෙනවිත් පෙන්විය යුතුය. එවිටයි ඔබ මැජික් එකට අත්පොලසන් ලබා දෙන්නේ.

මගේ ලයිසං ගැනිල්ල

මේකත් මේ ලයිසං කතාවක්ම තමයි.  දැනට මාස තුනකට විතර උඩදි මාත් ලයිසං  ගන්න කියලා ගම්පහ කච්චේරියට ගියා. මට ඕන උනේ සැහැල්ලු වාහන ලයිසං ගන්ඩ නෙමේ  බයිසිකල් ලයිසං ගන්ඩ. සැහැල්ලු වාහන ලයිසං එක් පස්සේ ගන්නවා කියලා හිතලා වැඩේ කල් දැම්මා. ඒ වෙනුවට මම බයිසිකල් ලයිසං ගන්ඩ ඉල්ලුම් කලා.

මම ගියේ ලර්නර්ස් එකක් හරහා නෙමේ. ඒ නිසා මම ලයිසං ගන්න පාවිච්චි කරපු සහ මට කන්න සිද්ධ වෙච්ච කටු ගැන තමයි මේ ලිපියෙන් ලියවෙන්නේ.

ඊට කලින් කියන්ඩ ඕන ලයිසං ගන්න කවුරුහරි හිතාගෙන ඉන්නවා නම් ලර්නර්ස් එකක් හරහාම යන්න. එහෙම නැතුව ලයිසං  ගන්න එක ටිකක් කේස්. මොකද අපේ සිස්ටම් එක හැදිලා තියෙන්නේ ලර්නර්ස් එකකින් කලොත් විතරක් ගොඩ යෑමේ සම්භාවිතාවක් තියෙන විදිහටයි.
ලයිසං ගන්න යන ඕනම කෙනෙක් මුලින්ම කරන්න ඕන මෙඩිකල් රිපෝට් එකක් ගන්න එක. ඒකට රථවාහන දෙපාර්තුමේන්තුවේ අනුමැතිය ඇතුව පිහිටවපු ආයතන පිහිටවලා තියෙනවා. අන්න ඒ ආයතනයකින් ගන්න මෙඩිකල් විතරයි රථවාහන දෙපාර්තුමේන්තුවෙන් පිලිගන්නේ.

එක දිස්ත්‍රික්කයකට එක ගානේ වගේ මෙඩිකල් ගන්ඩ පුලුවන් රජයේ ආයතන පිහිටවලා තියෙනවා. අන්න ඒ වගේ ආයතනයකින් මෙඩිකල් එකක් ගෙනාවා නම් හරි.