පළමු දිගහැරුම | දෙවන දිගහැරුම | තෙවන දිගහැරුම | සතරවන දිගහැරුම | පස්වන දිගහැරුම | සයවන දිගහැරුම | සත්වන දිගහැරුම | අටවන දිගහැරුම
දිනෙන් දින ගතැවී පුන් පොහෝ දින ලං විය.
නයනතාරාගේ දෙමව්පියන්ට ඉස්පාසුවක් නැති කාළයක් උදා විය. ඔවුහූ මේ මංගල්ලයට අවශ්‍ය අඩුම කුඩුම සොයන්නට ද නෑ හිත මිත්‍රාදීන්ට බුලත් දී ආරාධනා කිරීමට ද මහන්සි වූහ.
මේ වන විට නයනතාරාගේ මල්ලි ද ගම ඇවිත් තිබුණි. මා කිසිම විටක නයනතාරාගේ මලයෙකු ගැන පාඨක ඔබට කියා නැත. ඒ ඔහු මේ කතාන්තරයට අදාල වන්නේ නැති නිසා ය. අනවශ්‍ය චරිත ගොන්නකින් පාඨක ඔබව වල්මත් කරවීම මගේ කතා විලාශය නොවේ.
නයනතාරාගේ මලයා වසර ගණනාවක් ම ජීවත් වූයේ කොලොම්තොටම වූ සිසු නේවාසිකාගාරයක නැවතී ය. ඔහුද නයනතාරා මෙන් කොලොම්තොට ප්‍රකට බාලක පාඨශාලාවක උගෙන ගනියි. මේ නිසා ඔහු විජේරාමයට එන්නේ වසරකට වරක් හෝ දෙවරක් ය.
මෙවර ඔහු ගම ආවේ තම එකම අක්කාගේ සරණ මංගල්ලයේ වගකීම් ඉටු කරන්නට ය.
ඔහු නයනතාරා මෙන් කපටි ගති ඇත්තෙකු නොවේ. පස් පවින් හා සුරා සූදුවෙන් තොරව දැහමින් ජීවත් වන බොදු දරුවෙකි. මෙසේ බලන කළ ඒශාන් හා නයනතාරාගේ මලයණ්ඩිය පූර්ව ආත්මයක එක කුස උපන් දෙසොහොයුරන් වන්නට ඇත.
ඒශානුත් නයනතාරාගේ මලයාත් බලාපොරොත්තු වූවේ හෙළ කුළ සිරිතට මේ සරණ මංගල්ලය සිදු වේවි යැයි කියා ය. එහෙත් නයනතාරාට උවමනා වූයේ පරගැති රෝම ලන්දේසි සිරිතට අනුව ඉංගිරිස් පොතේ අත්සන් කර විවහා වීමට ය.
ඕලන්දක්කාර හුරුවට කටයුතු සිදු කිරීමට උවමනා බව ඈ කලින් සිටම ගෙදර සියල්ලන්ව දැනුවත් කර තිබිණි.
ඒ අනුව හෙළ සිරිතට ඈ පෝරුවට නැගින්නේ නැත. ගොක් සැරසිල්ලෙන් නිවස සරසන්නේ ද නැත. ගොක් සැරසිල්ලේ කාර්යය ක්‍රේප් පටි වලට බාර දී තිබේ. සෞභාග්‍යයේ සංකේතය වූ පුන් කලස් වෙනුවට ඇත්තේ සායම් ගැල්වූ මල් බඳුන් ය. රබන් හඬවා ගමටම මගුල් සිරි බෙදන්නේ ද නැත. ඒ වෙනුවට පරංගින් ගෙන් දායාද වූ ග්‍රැම ෆෝන් ගීත ද වාදනය කිරීමට සූදානම් කර ඇත. කොටින්ම මේ මංගල්ලය හෙළ කුළ කුමරියකගේ මංගල්ලයකට වඩා ඉංගිරිස් රැජිණකගේ මංගල්ලයක හුරුව ගෙන තිබුණි.
ඒශාන් අයියාගේ හොඳම යහළුවන් කිහිපදෙනෙකුටම තම දෙමාපියන් බුලත් දී ආරාධනා කර තිබිණි. නයනතාරා නම් තමන්ගේ එකදු යෙහෙළියකටවත් ඇරයුම් යවා තිබුණේ නැත. ඒ ඇගේ පට්ටන්තරේ ඒශාන්ගේ නෑදෑයෝ ඉදිරියේ දිග හරිමින් තමාගේ 'සායම' යවාවි ය යන බය නිසා ය.
නයනතාරාගේ එකම යෙහෙළියක ලෙස ආරාධනා ලැබුවේ ශනාලී ය. ශනාලී නයනතාරාගේ යෙහෙළියකටත් වඩා තම රහස් රැකි සුරක්ෂිතාගාරය වැනි යුවතියකි. නයනතාරාගේ සියළුම රහස් දන්නේ ශනාලි වන අතර ඇගේ සියළුම රහස් ද නයනතාරා දනී.
මේ නිසා ඇයට ආරාධනා නොකර බැරි ය. මීට අමතරව ගමෙහි කිහිපදෙනෙකුටද දෙමව්පියන් බුලත් දී තිබුණි. දෙපාර්ශවයෙන්ම පනහකට ආසන්න පිරිසකට ඇරයුම් කර තිබුණු බව නයනතාරාගේ මව නයනතාරා සමඟ පැවසුවා ය.
නොනිදි දින කිහිපයක ඇවෑමෙන් මංගල දින උදා විය.
ඒශාන්ගේ පාර්ශවයෙන් නෑදෑ හිතමිත්‍රාදින් උදේම පිටත් වී තිබුණි. ඔවුන් ගංගොඩවිල පසු කරන විට ඉර මුදුන් වීමට ආසන්න වී තිබුණි. ඔවුන් ආ ගැල් පෙළ ගේ ඉදිරිපිට වූ පාරේ නවතා සියල්ලෝම ඉන් බැස ගති. ඒශාන්ගේ මව ඔසරියකින් සැරසී සිටි අතර අගස්ති මාලයක් ඇගේ ගෙලෙහි අලංකාර බව වැඩි කළා ය. ඔහුගේ පියා සරමකින් හා බැනියමකින් සැරසී කපු සළුවක් ගෙලෙහි රුවා සිටියේ ය.
නයනතාරාගේ ඉල්ලීම පරිදි ඒශාන් අයියා බටහිර ඇඳුම් අයිත්තමින් සැරසී සිටි අතර නයනතාරා බටහිර විලාසිතාවකින් හැඩවී සිටියා ය. ඈ තොල් ද නිය ද දෙකොපුල් ද වර්ණ ගන්වා සිටියේ රඟහලක නාටිකාංගනාවක් සිහි කරවන පරිද්දෙන් ය.
හෝරාවකට ආසන්න කාළයක් කියැවෙන අශ්ඨක නැත. ළමා සාරිය ඇඳි දැරියන්ගේ සුමධුර ජය මංගල ගාථා සජ්ඡායනය ද නැත. තනි වාක්‍යයකින් සරණ මංගල්ලය සිදු වූ අතර තීන්ත කූඩුවෙහි ගිල්වූ කටු පෑන් අත්සනකින් මේ මංගල්ලය නීතිගත කෙරිණි.
නීති කටයුතු වලින් අනතුරුව සියල්ලෝම තැන තැන විසිරී කතා බස් කළහ.
මෙදින පොහෝ දිනක් බැවින් ඒශාන්ගේත් නයනතාරාගේ මලයාගෙත් බලවත් පෙරැත්තය නිසා කෑම මේසය පිළිහුඩු ජාතීන්ගෙන් හා සුරාවෙන් තොර විය. එහෙත් තරුණ කොළු නඩය මේ බව කල් තියාම දැන උදෙම්ම පමුණුවෙන් රා කළ කිහිපයක් මිලදී ගෙන ඒවා වැට මායිමේ සඟවා තැබී ය.
දහවල් වන විට නොයෙක් කෑම ජාති වලින් ද සිසිල් බීම ජාති වලින් ද අමුත්තන්ට සංග්‍රහ කෙරුණි. පසුබිමින් ග්‍රැමෆෝන් ගී ද වාදනය විය.
කලින් සූදානම් කරන ලද රා බී තරුණයෝ නොයේක ගී ගයමින් බමන මතින් නැටූහ. එක් තරුණයෙක් නයනතාරාගේ මල්ලි වෙතට අවුත්,
"මොකද්ද මල්ලි ! දාලා තියෙන්නේ බල්ලෙක්ටවත් අහන්ඩ බැරි සිංදුනේ ! මේ වෙලාවට නැගලා යන සිංදුවක් දාන්ඩකෝ !" යැයි ඉල්ලීමක් කළේ ය.
මල්ලීද බැරිම තැන එවකට ජනප්‍රිය ගායකයෙකු වූ චන්දරසේනයන්ගේ 'බල්ලා මාර්ක්' ඇච් ඇම් වී තැටියක් ගෙන වාදනය කෙරුවේ ය. ග්‍රැමෆෝනය උච්ච ස්වරයෙන් වාදනය විය. ගීය වූයේ,
"සුදු පිරුවටයයි... මංගල යහනයි..
කඳුලින් තෙමනු එපා....
ඔබේ නිදොස් බව ලොවට කියන්නම්..
මට දොස් නගනූ එපා... "
ගීය ඇසූ මැදිවියේ ගැහැණුන් සාරි පොටින් මුව වසා සිනා සුනා ය.
තැන තැන රැස්වූ තරුණියෝ,
"නයනතාරාටම හරි යන සිංදුව !" යැයි කියා කොක් හඬ ලා සිනාසුනා ය.
"අපිනේ දන්නේ මුන්දෑ නටපු නාඩගං ! නල්ල මලේ අම්මණ්ඩි නෙව !" තව එකියක් කීවා ය.
"මුන්දෑ මායම් දාලා කොල්ලව දැපනේ දාගන්ඩ ඇති. පවු ඒ අයියා හරි අහිංසක පාටයි. වෙලාවක මට ඒ අයියා ගැන දුකත් හිතෙනවා !" තව එකියක් පිළිතුරු බැන්දා ය.
"මේං බලහල්ලාකෝ ! මේකිගේ හිත උණු වෙලා තියෙන තරමක් !" යැයි තව එකියක් කීවා ය. සියල්ලෝම ඒ කතාවට මහ හඬින් සිනාසී ය.
ගීයේ අන්තරා කොටස ගුවන් ගැන්වීමට පෙර නිවස තුළ සිට දිව ආ නයනතාරාගේ පියා ග්‍රැමෆෝනය අසල වූ නයනතාරාගේ මලයාට බැන වැදී ඔහුගේ පස්සා පැත්තට පා පහරක් ද දී එලවා දැම්මේ ය. ඉන් පසුව ඔහු ග්‍රැමෆෝන් තුඩ තැටියේ වෙන පැත්තක තබමින් ගීය මාරු කලේ ය.
මෙවර වාදනය වූයේ,
"ඔබ හිමි වුණා නොවෙයි ඔබ මට හිමි කළා..
අප ළං වුනා නොවෙයි ඔබ මා ළං කළා..
හිත් හැඳුනුවා නොවෙයි දෑඟිලි එක් කළා..
අපි සැනසුනා නොවෙයි වෙන අය සැනසුවා.. "
මේ ගීය කණ වැකුණ ඒශාන්ගේ මුහුණ ද වෙනස් විය. ඔහුගේ මුහුණට සියුම් දුකක් ආරූඪ වූයේ ය. ගීයේ පරිද්දෙන්ම නයනතාරාව ඔහුට හිමි වූවා නොවේ ගුරු දෙමාපියන් විසින් ඔහුට නයනතාරාව හිමි කලේ ය. ඒහෙත් ප්‍රීතියෙන් උද්දාම වූ නයනතාරා මේ කිසිවක් දැන උන්නේ නැත.
සියල්ලෝම කා බී ප්‍රීති වෙමින් නිවෙස් කරා ගියහ.
ඉන් අනතුරුව යුවතිපති දෙපළ ධර්මායතනයේ නායක හාමුදුරුවන් බැහැ දැකීය. උන්වහන්සේ නව යුවලට ආසිරි පැතූ සේක. ඒශාන් අයියාට ද උන්වහන්සේ විශේෂ ආශිර්වාදයක් සිදු කොට ඔවුන්ව පිටත් කොට හැරියේ ය.
පසුව සියල්ලෝම කලින් සූදානම් කරගත් මොරිස් මයිනර් කාරයක නැගී කොළඹ වරාය තෙක් පවනට බඳු වේගයෙන් ආහ.
-මතු සම්බන්ධයි-
No comments:
කමෙන්ට් එකක් දාලම යමු ද ?
ඔබේ කමෙන්ට්ස් සිංහලෙන්, English වලින් හෝ සිංglish වලින් ලියන්න.