දුම්රිය අනතුරකට මුහුණ පෑමට සිදු උනෙමි

 වෙනදා වගේම මම පුතාව ඉස්කෝලේට ඇරලවන්න ආවා. උදේ නිකන් වහින්න වගේ අහසේ කළු වලාකුළු තිබ්බ නිසා මම බයිසිකළය පනදුරෙන් දාලා බස් එකේම කළුතරට ආවා. උදෙන්ම හම්බ වෙච්ච මාතර බස් එක නිසා 6:30 වගේ වෙනකොට කළුතරට ඒ ගන්ඩ පුළුවන් උනා.

පුතාව ඉස්කෝලෙන් තියලා මම ආයෙම පානදුරේට එන්ඩ කළුතර ටවුම දිහාවට පයින් ආවා. කළුතර ස්ටේශන් එකට ඇවිත් ටිකට් ගන්නකොටම කළුතරින් පටන් ගන්න කෝච්චිය එන බව දැනුම් දුන්නා. මම ඒ කෝච්චියට නගින්ඩ පළමුවෙනි වේදිකාවට වෙලා ඉන්නකොට තමයි දෙවෙනි දැනුම්දීමක් ලැබුනේ. ඒ බෙලිඅත්තේ ඉදලා එන සාගරිකා කෝච්චිය දෙවෙනි වේදිකාවට එනවයි කියන එක. ඉතින් ස්ලෝ එහෙක යනවට වඩා එක්ස්ප්‍රස් එහෙක ඉක්මනට යන්ඩ පුලුවන් නිසා මාත් දෙවෙනි වේදිකාවට මාරු වෙලා සාගරිකා කෝච්චියට ගොඩ උනා.

උදේ ඔෆිස් ටයිම් එක නිසා ටිකක් සෙනග වැඩියෙන් හිටියා. මාත් බැහැගන්ඩ ලෙහෙසි නිසාම කෝච්චියේ ඇතුලට හිරවෙලා යන්නේ නැතිව දොර කිට්ටුවෙන්ම වගේ උන්නා.

ටික වෙලාවකින් කෝච්චිය කළුතරින් පිටත් උනා.මාත් ඔහේ මනෝපාරක් ගහගෙන හිටියේ. කෝච්චියත් සෑහෙන වේගයෙන් යනවා. හරියටම වාද්දූව ස්ටේශන් එක පහු උනා විතරයි. එක සැරේටම කෝච්චිය උඩ පැන්නා වගේ උනා. අර බස් එකක් ස්පීඩ් බම්ප් එකකින් හයියෙන් ගියහම උඩ යන්නේ.... ආන්න ඒ වගේ කෝච්චිය උඩ ගියා. ඊට පස්සේ මොකවත් හිතන්ඩ වේලාවක් උනේ නෑ. නොහිතන තරම් වේගයකින් කෝච්චිය දෙපැත්තට පැද්දෙන්ඩ ගත්තා.

ඒ පැද්දිල්ලට ඇළුතේ හිටගෙන හිටපු අය එහේ මෙහේ වැටෙන්ඩ ගත්තා. මම අල්ලගෙන හිටපු යකඩ බාර් එක තව හයියෙන් අල්ල ගත්තා. ඊට පස්සේ තත්පරේදී කළුගල් කෑලි උඩ ගහන්න ගත්ත. ඒත් එක්කම එංජිම හරියෙන් කළුපාට දුමාරයක් ආවා.

මගේ හිතට ආපේ එකම එක අදහසයි. කෝච්චිය කොයි වෙලාවක හරි කොයි පැත්තට හරි පෙරලෙයි කියලා. 

අම්මෝ එක බයටම මගේ නිකන් ප්‍රෙශර් එකත් වැඩි වෙලා වගේ කියලා දැනෙන්ඩ ගත්තා. 

පෙර පිනකට වගේ කළුගල් ගොඩ දිගේ ඇදීගෙන ගියපු කෝච්චිය කිසිම පැත්තකට නොපෙරලී නතර උනා. ඊත් ඔලුව නිකන් තෝන්තු වෙලා වගේ.

එක විනාඩියකට විතර පස්සේ "කෝච්චිය පීලි පැනලා" කියලා කවුදෝ කියනවා ඇහුනා, කෝච්චිය පෙරලෙන්ඩ කලින් මං හනිකට බැහැගත්තා. බැහැලා ලඟම තිබ්බ තාප්පෙකට හේත්තු වෙලා ටික වෙලාවක් හිටියා.

ජීවිතේ මරණ බය දැනිච්ච අවස්ථාවක් ඒක... !

ඔන්න විනාඩි කිහිපයකට පස්සේ කට්ටිය තම තමන්ගේ ෆෝන් වලින් කෝච්චියේ වීඩියෝ, පොටෝ ගන්න ගමන් හිටියා. මම එතැන එක විනාඩියක්වත් ඉන්නේ නැතිව ආයේම ගාළු පාරට ආවා.

වාසනාවකට වගේ කිසිම ජීවිත හානියක්වත් වෙලා තිබුනේ නෑ. ඒ වගේම බරපතල තුවාල ලබපු අය උන්නෙත් නෑ.

අනූනමයෙන් සෑහෙන ඔක්කෝම දෙනා බේරිලා තිබුනා.

මේ ඒ සිදුවීම මුහුණු පොතට එක් කරලා තිබුන කෙනෙක්ගේ වීඩියෝ සහ පින්තූර පෙළක්..

කොහොමහරි මේ සිදුවීම නිසා අද දවසම වගේ මුහුදුබඩ දුම්රිය මාර්ගයේ වාද්දූවට වෙනකන් විතරයි කෝච්චි ධාවනය උනේ. ඒ නිසා මිනිස්සුන්ට ගෙදර යාගන්ඩ නොමිලේ බස් සේවයකුත් රජයෙන් දාලා තියෙනවයි කියලා පණිවිඩයක් හුවමාරු වෙලා තියෙනවා. ඒක නම් කොහොමද දන්නේ නෑ

වේලාව හරියටම 7:28 වෙනකොට තමයි මේ අනතුර සිදු උනේ. ආයේ නම් කාළයක් යනකන් කෝච්චි වල නම් යන්නේ නෑ.