කුශ්ඨරාජගල බලලා ආයෙම ගාළු පාරට එනකොට වෙලාව හැන්දෑවේ දෙක විතර වෙලා තිබුණා. ඊට පස්සේ අපි ගාළු පාරේ මාතර දිහාවට එනකොට පාර අයිනේම තිබ්බ පොඩි කඩේකින් දවල්ට කෑවා. දැන් ඉස්සර වගේ නෙමේ කඩේකින් පොඩි දෙයක් කෑවත් රුපියල් 500ට එහා ගානක් යනවා.
දවල්ට කාලා අපි කෙලින්ම ආවේ මාතර තානායමට. මාතර තානායම තියෙන්නේ ටවුන් එකේමයි. හරියටම මාතර - කොළඹ හයිවේ බස් නැවතුම්පොළ කිට්ටුවෙන් තියෙන්නේ. තානායම මුහුද කිට්ටුවෙන්ම තියෙන නිසා මුහුදෙන් නැගෙන අතොරක් නැති රල හඬ හැම වෙලේම ඇහෙනවා. ඒත් එක්කම මුහුදු හුළඟ නිසා කොච්චර රස්නයක් තිබ්බත් ඒක වැඩිය දැනෙන්නේ නෑ. ටවුන් එක කිට්ටුවෙන්ම තිබ්බත් ටවුන් එකේ තියෙන ලොකු ඝෝෂාවක් නම් මේ තානායමට ඇහෙන්නේ නෑ.
මේක නාගරික සංවර්ධන අධිකාරියෙන් කරවන ආයතනයක් නිසා කාමර ගාස්තු ලොකු ගානක් උනේ නෑ. (රුපියල් 7,500ක් වෙනවා ඩබල් රූම් එකක්) ගිය අවුරුද්දේ නම් මීටත් වඩා ගණන් අඩුයි. හැබැයි කෑම බීම නම් වෙනම ගන්න ඕන. ඒවත් ඉතින් එච්චර ලොකු ගානක් වෙන්නේ නෑ.
වෙනත් තරු පන්තියේ හෝටල් වල වගේ හෝටලය වටේ ඇවිදලා බලන්න තරමේ ලොකු දේවල් ටිකක් නම් නෑ. ඉදිරියෙන්ම තියෙන ලොකු නුග ගහ යට තියෙන බංකු පේළියේ වාඩි වෙලා මුහුද දිහා බලාගෙන පොඩි කතාවක් දාලා ඉන්න නම් මරු තැනක්. ඒ වගේම කඩා වැටුන පරෙවි දූවේ පාළමයි පරවි දූවයි ඈතින් පේනවා. ඒ ඇරෙන්න වැඩි යමක් නෑ.
මේ තානායම ලන්දේසි පාළනය කරන කාළයේදි ලන්දේසි වෛද්‍යවරුන් නවාතැන් ගත්තු තැනක් කියලා මට අන්තර්ජාලයේ පීරනකොට ලංකාදීප ලිපියකින් දැන ගන්ඩ ලැබුනා. කොටින්ම මේ තානායමේ ගෘහ නිර්මාණ ශිල්පය දිහා බැලුවහමත් පොඩි ඇන්ටික් ලුක් එකක් තියෙන්නේ. ඒ නිසා ඒ කතාව බොරු වෙන්ඩත් බෑ.
එහෙනම් අපි පහුවදාට හමු වෙමු... ජය වේවා !
No comments:
කමෙන්ට් එකක් දාලම යමු ද ?
ඔබේ කමෙන්ට්ස් සිංහලෙන්, English වලින් හෝ සිංglish වලින් ලියන්න.