හිච්චි උපාලිගේ මෙගා වංචාව

 කාලෙන් කාලෙට මොන මොනවා හරි සිද්ධි ඇවිල්ලා බුකිය ඇඉලෙන එක සාමාන්‍ය දෙයක් වෙලා. මේ දවස්වල බුකිය හොඳටම ඇවිලිලා තියෙන්නේ විනී ප්‍රඩක්ශන්ස් ලාගේ පට්ට ස්කෑම් ප්‍රොමෝශන් වීඩියෝ එක නිසා. වීඩියෝ එකේ නම හිච්චි උපාලි !

ඉතින් මේ වීඩියෝ එක දැක්කට පස්සේ මටත් හිතුනා වීඩියෝ එක පිළිබඳ මගේ සත දෙක ගැන පෝස්ට් එකක් ලියලා දාන්න.

මුලින්ම පොඩි පැහැදිලි කිරීමක් කරලා ඉන්නම්කෝ මොකද්ද මේ ස්කෑම් එකෙන් වෙන්නේ කියලා. එක්තරා රෙස්ටුරන්ට් එකක ශාඛාවන් යුරෝපා රටවල් වල ආරම්භ කරන්න යනවලූ. කලින් වීඩියෝ එකක නම් කිව්වේ ලැට්වියාවෙත් මේ රෙස්ටුරන්ට් එකක ශාඛාවක් දාලයි තියෙන්නේ කියලා. ඉතින් ඒකේ වැඩ කරන්න ඕන කරන ශ්‍රමිකයන්ව ලංකාවෙන් තෝරගෙන අදාල යුරෝපා රටවල් වලට නොමිලේම පිටත් කරනවයි කියලා තමා මේකීන් කියැවෙන්නේ. ඊට අවශ්‍ය වෙන වීසා ෆී එක, ටිකට් වී වගේ ඔය එකී මෙකී නොකී හැම ෆී එකක්ම අදාල රෙස්ටුරන්ට් එකෙන් දරනවයි කියලා තමයි වීඩියෝ එකෙන් කියැවුනේ. අයදුම් කරුවන්ට කරන්න තියෙන්නේ ෆොර්ම් එක ඩවුන්ලෝඩ් කරලා රුපියල් 1500ක මුදලක් රෙස්ටුරන්ට් එකේ ගිනුමට බැර කරලා ෆෝර්ම් ඒක එවන එක විතරයි. එතැනින් එහාට හැමදේම ඒගොල්ලෝ බලාගන්නවා කියලා තමයි ඔය ස්කෑම් එකෙන් කිව්වේ.

මුලින්ම කියන්න ඕන ඔය වීඩියෝ එකට සල්ලි ගෙවපු රෙස්ටුරන්ට් කාරයාගේ මාර්කටින් මැනේජර් හෝ මාර්කටින් ටීම් එකේ ප්ලෑන් එක පට්ටම පට්ට ! සුපිරි ඩයල් එකක් හොඳටම හිතලා ගහපු මාස්ටර් ප්ලෑන් එකක් තමයි මේ ප්‍රොමෝශන් එක.

ප්ලෑන් එක සුපිරියක් වෙන්නේ මෙහෙමයි. පළවෙනිම දේ තමයි ප්ලෑන් එක ක්‍රියාත්මක කරගන්න තෝරගත්තු කස්ටමර් බේස් එක ! විනීලා එක්ක ගොඩක්ම එකතු වෙලා ඉන්නේ ගම්වල ජීවත් වෙලා ඉන්න දුප්පත්, එහෙත් ගේමක් ගහලා ගොඩ එන්න දඟලන කොල්ලෝ කෙල්ලෝ සෙට් එකක්. බොහෝ දුරට මේ අය ටිකක් ඉමෝශනල් සෙට් එකක්. කොටින්ම ඕනෑම ප්‍රශ්නයකට මොළයට කලින් හදවත ඉස්සරහට දාලා කටයුතු කරන සෙට් එකක්. ඒ නිසා ඒ අය අතරේ ස්කෑම් එක ස්ප්‍රෙඩ් කරන එක සෑහෙන්න ලෙහෙසියි.

දෙවෙනි කාරණාව තමයි මේ දවස්වල රටේ තියෙන ආර්ථික අර්බුදත් එක්කම මිනිස්සු උත්සහ කරමින් ඉන්නේ කොහොමහරි ගේමක් ගහලා රට ගිහින් එහේ ස්ථීරවම ජීවත් වෙන්න පුලුවන් විදිහේ ප්ලෑන් එකක් ගහන්න. ඒ නිසා මේ වගේ ස්කෑම් එකක් මේ කාලේ හැටියට ඉක්මනින්ම පැතිරෙන්න ලේසියි.

තුන්වෙනි කාරණාව තමයි ඒගොල්ලෝ බලාපොරොත්තු වෙන්නේ ගොඩක්ම අඩු මුදලක්. අඩු මුදලක්, වැඩි පිරිසකගෙන් ලබා ගැනීමටයි බලාපොරොත්තු වෙන්නේ. හොර ඒජන්සි, පිරමිඩ් කාරයෝ වගේ ලොකු මුදලක් එක සැරේම ඉල්ලන්නේ නෑ. අනික නැති උනත් නැති වෙන්නේ රුපියල් 1500ක් වගේ ගොඩක්ම පොඩි මුදලක් නිසා ගොඩක් දෙනා නඩු කියන්න යන්නෙත් නෑ. බොහෝ දුරට පොලිසි යන එකකුත් නැති වෙයි. ඒ නිසා වැඩේ චොර උනත් ඔහේ අත ඇරලා දාන සීන් එකක් තමයි තියෙන්නේ. 

හතරවෙනි කාරණව තමයි වැඩේ චාටර් උනත් ඒකේ හානිය කෙලින්ම රෙස්ටුරන්ට් එකේ සෙට් එකට එන්නේ නෑ. ඒක විනීලාගේ ගිනුමට බැර වෙලා උන්ගේ කිර්තිනාමයට හානි වෙලා තත්වය සමනය වෙනවා. එතකොට රෙස්ටුරන්ට් එකට සිද්ද වෙන හානිය අවමයි.

ඔන්න ඔය වගේ සිද්ධි කිහිපයක් නිසයි මම කියන්නේ මේ ස්කෑම් ප්ලෑන් එක පට්ටම පට්ට ප්ලෑනක් කියලා.

මේ ස්කෑම් එක ගැන සමාජ මාධ්‍ය වල දිගින් දිගටම පහර දෙන්න ගත්තහම ස්කෑම් එක ස්ප්‍රෙඩ් කරපු සෙට් එකට තේරෙනවා ප්ලෑන් එක බැක්ෆයර් වේගෙන යනවයි කියලා. ඒ කියන්නේ හිතන තරම් කට්ටියක් මේකට රැවටෙන්නේ නැති වේවි ය... නීතිමය ප්‍රශ්නත් පැන නගින්න පුලුවන් වේය කියලා හිතෙන්න ගන්නවා. ඔන්න ඊට පස්සේ තමයි දෙවෙනි ප්ලෑන් එක ක්‍රියාත්මක වෙන්නේ. ඒක සිද්ධ වෙන්නෙත් විනීලා හරහා.

විනීලා හරහා තව වීඩියෝ එකක් කරවලා මේ 1500 අවශ්‍ය නැති කතාවක් කියලා වීඩියෝ එකක් කරවනවා. මෙතනදි විනීලා සෑහෙන උත්සහයක් දරණවා රු 1500යේ කතාව සාධාරණීකරණය කරන්න. ඒක හරියට තමන්ගේ හෙලුව අතින් වහගන්න හදන වෑයමක් වගේ. කොච්චර වහන්න හැදුවත් පේන්න ගන්නවා. අනිත් එක තමයි මේ ස්කෑම් එක ගැන දැනුවත් කරපු සෙට් එක හෑලි ලියන සෙට් එකක් විදිහට පල් එකත් දාලා කතා කරන සීන් එකක් වෙන්නේ.

මෙතැනදි තවත් අපූරු දෙයක් සිද්ධ වෙනවා. මේ මාර්කටින් ප්ලෑන් එක ගහපු රෙස්ටුරන්ට් එකේ සෙට් එකට හිතෙනවා තමන් වියදම් කරපු වුදලවත් පියවගන්න බැරි සීන් එකක් යන්නේ කියලා. මොකද දැන් 1500යේ කෑලි ටික ආයේ රිෆන්ඩ් කරන්න වෙනවා. අළුතින් රෙජිස්ටර් වෙනකොට ගානක් අය කරන්නෙත් නෑ දැන්. මේ නිසා ඒ අයගේ පාඩුව පියවගන්නේ අපූරු විදිහකට... ඒ අය දැන් කියනවා ඔයාලාට ෆෝර්ම් වල ප්‍රොසෙසින් ෆී එක විදිහට ගෙවන්න සිද්ධ වෙච්ච 1500 ගෙවන්න ඕන නෑ. ඒ වෙනුවට තමන්ව තේරුනොත් පොඩි ගානක් ගෙවන්න වේවි ය කියලා.

මුල්ම වීඩියෝ එකට අපි ආයේම ගියොත් එතැනදි කියව්වේ කිසිම ගාස්තුවක් ගෙවන්න ඕන නෑයි කියලා. ඔන්න දැන් කියනවා තේරුනොත් පොඩි ගානක් ගෙවන්න ඕන කියලා. ඔන්න ඕක තමයි ඔය ස්කෑම් කැම්පේන් එකේ ප්ලෑන් බී එක. බොහෝදුරට පළවෙනි ඉන්ටර්විව් එකෙන් ගොඩ දෙනෙක්ට පාස් කරවලා දෙවෙනි ඉන්ටර්විව් එකට එන්න කියන්න කලින් යම් මුදලක් අය කරන්න ගනියි. එතකොට වෙන්නේ මේ ස්කෑම් එක ගැන තිබ්බ රශ් එක හොඳටම නිවිලා ගිහින් කට්ටියට මේ සීන් අමතක වෙලා යනවා. ඊට පස්සේ කට්ටිය ආයෙම මේ ප්ලෑන් එකට රැවටෙන්න ගන්නවා. මොකද ලංකාවේ මිනිස්සුන්ට දෙයක් මතක තියෙන්නේ ටික කාළයයි නෙහ්.

කලින් සම්පූර්ණයෙන්ම ෆ්‍රී කරපු වැඩක් දෙවෙනි සැරේට සල්ලි ගෙවන්න වෙන එක සැක හිතෙන කාරණාවක් නෙහ්.

මෙතැනදි විනී සෙට් එක කිසිමදෙයක් නොතේරෙන ගානට ඇන්දිලා හෝ මේ සේරම දැනගෙන ඒවා වහන්න හදන සීන් එකක් තමයි අපිට පේන්න තියෙන්නේ.

මොකද ඒ සෙට් එකට වීසා ප්‍රෝසෙස් එක ගැන මේ ලෝකේ අදහසක් නෑ කියලා තේරෙනවා කරන කියන කතා වලින්. කිසිම පුද්ගලික ආයතනයකට වීසා ලබාදීමට හැකියාවක් නෑ. ඒක වෙන්නේ අදාල රජය හරහා. ඒක ගැනවත් විනී සෙට් එකට අවබෝධයක් නැති වීම කනගාටුවට කරුණක්.

අවසාන වශයෙන් මේ මාර්කටින් ප්ලෑන් එක ස්කෑම් ප්ලෑන් එකක් විදිහට අඳුන ගන්න තියෙන දේවල් ටිකකුත් කියලා ඉන්නම්.

පළවෙනි කාරණාව තමයි මේ මාර්කටින් ප්‍රොමෝශන් ප්ලෑන් එක සිදු වෙන්නේ ජීමේල් එකක් හරහා. ප්‍රොෆෙශනල් විදිහට මාර්කටින් ප්ලෑන් එකක් ක්‍රියාත්මක වෙනවා නම් ඒක සිදු වෙන්න ඕන අදාල ආයතනයේ හෝ සමාගමේ නිල ඊමේල් ගිනුමක් හරහා. උදාහරණයක් විදිහට පීසාහට් වැනි ආයතනයක් තමන්ගේ ප්‍රොමෝශන් හෝ මාර්කටින් ඊමේල්ස් යවන්න ජීමේල් ගිනුමක් භාවිතා කරන්නේ නෑ. තමන්ගේ නිල වෙම් අඩවියට අදාල ඊ මේල් ගිනුමක් හරහායි මේ දේවල් සිදු වෙන්නේ.

දෙවෙනි කාරණාව තමයි මේ මාර්කටින් ප්ලෑන් එක ප්‍රොමෝට් කරන්නේ විනී ප්‍රොඩක්ශන්ස් ලා උනාට අදාල රෙස්ටුරන්ට් එකේ කිසිම නියෝජිතයෙක් මේකට සම්බන්ධ වෙලා නෑ.  කොටින්ම ඒ අයගේ වෙබ් අඩවියේ අදාල දැන්වීමේවත් කිසිම වගකිවයුතු පුද්ගලයෙක්ගේ කන්ටෑක් ඩීටේල් එකක් නෑ.

තුන්වෙනි කාරණාව තමයි මේ ක්‍රියාවලිය සිදු කරන්න භාවිතා කරපු ඔන්ලයින් ප්ලැට්ෆෝම් එක කිසිම වෘත්තිමය භාවයක් නොමැති වීම. උදාහරණයක් ලෙස රැකියා බැංකු හෝ වෙනත් රැකියා ලබාදෙන ආයතනයක් හෝ වෙබ් අඩවියක් හරහා මේ කැම්පේන් එක ප්‍රොමෝට් නොකිරීම්.

හතරවන කාරණය වෙන්නේ අදාල දැන්වීමේ අවශ්‍ය කරන සුදුසුකම් හෝ පුරප්පාඩු තියෙන ජොබ් ඩෙසිග්නේශන් ටිකවත් හරියට සඳහන් වෙලා නෑ. කොටින්ම එනි කොලිෆිකේශන් ගැන කියලා තිබ්බට අඩුමගානේ මොන සුදුසුකමද කියලාවත් මේ දැන්වීමේ කියවෙන්නේ නෑ. (දැන්වීම කියලා කිව්වේ අදාල ආයතනය, එයාලගේ වෙබ් සයිට් එකේ දාලා තිබුන දැන්වීම )

ඔය වගේ තව නොයෙක් කාරණා නිසා මේක ස්කෑම් කැටගරියට දාල කතා කරන්න සුදුසු මාර්කටින් කැම්පේන් එකක් කියලා මම ස්දහන් කරන්න කැමතියි.

අවසාන වශයෙන් කියන්න කැමතියි මේ සිද්ධියෙන් අන්තීමට උනේ විනී ප්‍රොඩක්ශන්ස් මේ වෙනකන් ලබාගෙන තිබුණු කීරිතිනාමයට හානියක් සිද්ධ වෙච්ච එක විතරයි උනේ. කීර්තිනාමය ගොඩනගාගන්න ලොකු කාළයක් ගත උනාට ඒක නැති වෙන්න යන්නේ බොහොම සුළු වේලාවක් කියලා තේරුම් ගන්න තරම් ඔවුන් බුද්ධිමත් වේවි කියලා හිතනවා.

අනිත් දේ තමයි අන්තර්ජාලයේ මීට අමතරව තව තවත් මේ වගේ ස්කෑම් අනාගතයෙත් එන්න පුලුවන්. ඒවා අපට නවත්වන්න බෑ. මේ වගේ සල්ලි ඉල්ලන ඒවාම නොවෙන්නත් පූවන්. සමහර ස්කෑම් වලින් සල්ලි ඉල්ලන්නේ නෑ. ඔවුන් අපේ දත්ත එකතු කරන්නේ. උදාහරණයක් විදිහට අපේ දුරකතන අංක, ඊමේල් ලිපින වගේ අපටම විශේෂිත වෙච්ච දත්ත. ඒවා වලට අහු නොවි සිහි බුද්ධියෙන් කටයුතු කරන්න කියලා අන්තර්ජාලය පරිශීලනය කරන ඔබගෙන් කාරුණීකවම ඉල්ලනවා.